{WARSANRADIO} Madaxweynaha Soomaaliya Maxamed C/llaahi Farmaajo ayaa xil ka qaadis ku sameeyay saddex ka mid ah Taliyeyaasha Ciidamada dowladda, iyadoo Madaxweynuhu isla maanta magacaabay Taliyeyaal ciidan.
Xil ka qaadistan ayaa lagu soo bandhigay kulan Golaha wasiirada ku yeesheen maanta magaalada Muqdisho, iyadoo kulankaas uu ka qeyb galay Madaxweynaha.
Taliyihii ciidamada xoogga dalka Maxamed Aadan Buud ayaa xilka laga qaaday, waxaana lagu bedelay Taliye cusub oo lagu magacaabo Jen, Maxamed Axmed Jimcaale Cirfiid oo horay xilkan u soo qabtay sanadkii 2011.
Sidoo kale Taliyihii Ciidamada Booliska Jen. Maxamed Sheekh Xasan Xaamud ayaa xilka laga qaaday, waxaana lagu bedelay Jen. C/xakiin Daahir Saciid oo loo yaqaano Saacid.
Waxaa kaloo la bedelay Taliyihii Hey’adda Nabadsugida iyo Sirdoonka Qaranka Jen. C/llaahi Gaafow Maxamuud, kaasoo lagu bedelay C/llaahi Maxamed Cali Sanbaloolshe oo horay xilkan u soo qabtay, haatan ah Xildhibaan ka tirsan Baarlamaanka.
Abaandulaha Ciidanka Xoogga dalka ayaa loo magacaabay Jen. C/llaahi Cali Caanood, waxaana xilkaas laga qaaday Jen. Cali Baashi.
Xil ka qaadistan ayaa noqoneysa tii weyneyd ee muddo la sameeyay, sanadkii 2011 ayay aheyd markii Madaxweynihii hore Sheekh Shariif uu xilka ka qaaday dhamaan afarta Taliyeyaal ciidan ee xilligaas xilalka hayay.