Guddoomiyaha Gobolka Banaadir ahna Duqa Muqdisho Taabid Cabdi Maxamed ayaa iclaamiyay banaan bax weyn oo maalinta berri ka dhici doona Garoonka kubadda cagta ee Koonis Stadium.
Guddoomiye Taabid ayaa ugu baaqay shacabka Muqdisho inay ka soo qeyb galaan banaan bax duco iyo tacsi, si looga dhiidhiyo gumaadkii loo geystay shacabka.
“Maalinta berri waxaa jirta duco ama Tacsi ballaaran oo ka dhaceysa Muqdisho oo la isugu imaanayo Koonis Stadium, illaa magaalada lagu socon doonaa, si looga dhiidhinayo dhibka dhacay,”ayuu yiri Guddoomiye Taabid.
Sidoo kale Guddoomiyaha ayaa sheegay in berri ay tahay maalintii loo midoobi lahaa, gumaadkii iyo xasuuqii dadka Muqdisho lagu sameeyay, isla markaana ay tusi doonaa sida ay uga dhiidhiyeen.
“Dhalinyaroy Xamar aan la xoreyno xabaasha badatay”ayuu yiri Guddoomiye Taabid oo dhalinyaro is xilqaamay kula hadlayay goobtii uu qaraxa ka dhacay.
Maalin ka hor ayay aheyd markii banaan bax ballaaran uu ka dhacay fagaaraha Daljirka Dahsoon, halkaasoo boqolaal qof ay isugu soo baxeen, iyagoo ka careysan qaraxii dadka faraha badan lagu xasuuqay ee ka dhacay Sabtidii la soo dhaafay isgoyska Zoobe.