Waxaa faah faahin dheeraad ah laga helayaa Dagaal u dhaxeeyay Ciidamada Dowladda Federalka Somaliya iyo kuwa Koonfur Galbeed oo isku dhinac ah iyo Shabaab, kaasi oo ka dhacay duleedka Degmada Tiyeeglow ee Gobolka Bakool.
Dagaalkaan, ayaa wuxuu ka dambeeyay kadib markii dagaalyahano ka tirsan Shabaab ay wadada u galeen Kolonyo Ciidamada Dowladda Federalka Somaliya oo siday Sahay Shidaal ah.
Afhayeenka Maamulka Koonfur Galbeed Nuuradiin Abuukar Gacma ayaa Dhacdo.com waxa uu u sheegay in weerarka ay qaadeen Ciidanka Dowladda, balse aysan jirin wararka sheegaya in Ciidamada weerka lala eegtay.
Sidoo kale Nuuradiin ayaa waxa uu inoo sheegay khasaaraha dhankooda soo gaaray inuu yahay mid kooban, maadaama markii horeba ay u diyaar garoobeen dagaalka, dhanka Shabaab ayuu sheegay in ay gaarsiiyeen khasaare kala duwan.
“Ma jiraan wararka ah in Ciidamada weerar lala eegtay, waxaan kuu xaqiijinayaa in Ciidamada Millitariga ay weerarka qaadeen, jab weyn ayaa lagu gaarsiiyay Shabaabka, dagaalka wuxuu ahaa mid qorsheysan.” Ayuu yiri Afhayeenka Maamulka Koonfur Galbeed.
Degmada Tiyeeglow ee Gobolka Bakool waxaa gacan ku heynteeda maamulaya ururka Al-shabaab, Ciidanka Dowladda ayaa marar badan isku dayay in ay Shabaab ka saaraan degmada, balse weli uma aanay suuragelin.