Baydhabo Somaliya {WMN}-Afyaalu hibo lynool masqangtiis helithaasy suughaang hingjimeey habkaaysithaasy, hal ii lamy afyaal hadeery kory ingjarnuwu, mayny taas daliil kiingky ahaa, heeskungh araathy ii geethooshee ilaaheey niing hibiyeey sithy wal tar niinky eyiing, waany nii dareengsiyaaw sithy nim’athaas geethoo luku helaaw, hantithy ku booty uniiny unku hingdhy saabangny.
Dayby hoorsighy afyaalky, meely haky shiphy, maddii haniinku sheekeeyooyi, dhulky hothongnimaathiis, dheefty dhetiis kyjerty, ii sithy dadkaany unku roorsinghyiingh, hamar ii heeboosheey hunguri dartiis ingky boqtaalayaangh, wasing afyaalky haliing haliing niing tilmaami geethoo ii sithy manaafa’a bathang ing leyiing kolkoony uniiny inky aalaany.
Heg walby afyaalky kolkoony muku baaqsany, wali ku eri, may weeli, walibuwaa higdhoo ii dheghaa unku reebtooy afshoo ingdowoowshoo wu, afhaayshoowu, dareegothee, dhingsithee, hilooysithee, mijhilkoo kooy ku gaabsooy dhmisheey mysheenaaw, sithaasaa hamiing ii gee masqantiis ing gundhiyee, uso oo haalkii amangtaas umitiis kysughunty hal-abuursheey maansoothy ky saleeyaaw, hooby heathy fady, ol, abaar, nebed, ii weer doojhis, hataby tangh heesaa afyaalky hingdisi, meelkoo hogaanky ii ulhaayky ummutiis daraawi habaasty yee ky jertoony maansithungh ky hawraariyi.
HEES hubaalaa oghaaw umuty heliis shee,
Yaakheey afyaalky heesoosheey tang qobooy tang dhi’I leeyo, hooby heathy lahayty, wadiny, bir mydeerty, weer geliyoow intiby, wahathu afyaalky liky tuwunaathaaw, arlaathiny afshee liky awlaaliyaaw, tang iily dheegh, heesu lang jeelkgaly wali qalbisheey ii usy isweeydiyaayaangh, waany luku dhenegsithy kory hothinghni maathy afky maayky li shally eyi, dhinighy doowhiisky bilaanghty, iloow iny
Kuriity ii gebroo geeky rooghaangh iny afyaalathaany heesooghungh haathoow elifeeng waany jaraangh walbathang unku ogaayny, waany ayaang doruwu eeb ii ibaary le’ lang heesughungh haaysithy haanoo kaly isky anqaariyaaw may eraanaang heeroow Alloow, afyaal Mahamuud Haaji Mahamed Tarash, kolkoo nii shanqariiby heeskii jeelii kuu tebi, maadsheey wayteey maalmy shal moqonaayteengh, mathaghaa lymiiryaawi.