Baydhabo Somaliya-{WMN}-Isly dohowmeeng dathoow isly dohowneeng, wali haaytaay hees hees dhaafty miry, keer, muustiky ii e dintibby isky fuugsity, mayaanghtiyee lilily darjhiighothaaw, wadani waltareengh e dadsheey ii dalsheey inghduuphing bedengsheey derjhiigayaasy, waany ky abuuraasy wadiniyad daljeelaang ii iny usy aaminy araathiis.
Lang dheegheey heestung dheghaasheey kydhiithy baa kedkoony huwu lunku qabny iny dhiniyaasheey deyi, may welt miraa yee ku suubsanghty ya wali eyiiny haanoo kyfidhiyi miisaang afmaalaathii elifi yoo kyibireengh sithy umuty kolky yee isky duuphingty afaaf lahang moothy ii ay liniingky daphy korny kasanghshee sehel yoow hanky guthy gally korny.
Dhinighy nephediyee, oofshee taabky ii daaghy, walbarashoothiyee, sanaathiyee ii ilmishee wal haankilly baho korty, dooshee inghdareery kory, derisshee ii haggaas jareeshee beec mushtarishee inisdareershee dood ii da’wa laang tartiibtoo inismootisithy koraang yeethoo eeraab la’aang ety, daraawny liniinky howaayi korny.
Indhikaalshee gabalkaas may ky qaadny, sithy yee dareenky dadky gabalkaas rooghy ing kiithy too lytoo e yeethy haataaw lily misaaly kory af dad haku bahi may kiky soodeeyny, waliny ly goony haatheey fanaaniinghty Arlaathy Koonfur Galbeed, oo horboothaayi Af-yaalki wiinaay Maghaasheey lyhaayoow Mahamuud Haaji Mahamed Tarash, oo kontong siny ku reed goosin usubungh oo fanaaniing yar yar barbaar kurii ii gabry inisky jaraang ha saari masraha /faghaayky meraayky murtithy ii fanky reer Koonfur Galbeed liky aawlaaliyaaw ee beledky Baydhawu.
Kolkii garab ii gaashaang usy ku heli Mas’uuliyiinty KGS, oo yoo inky horeeyaang Mathywiinaaghy KG, Abdiasiis Hasan mahamed Lafta gareen ii gudoomiyighy goloo wakiilithy KG, Abduqaadir Shariif Sheekhunnaa Maye, hannaasoo naghatheeng ulhaaykii inky horeeyi deegaanathung KG oo reed ing ingdeyaang fanky ii fanaanky, Afyaalky ii keer suubiyayaalky laashimee ii goboytooda afmaalky e kynool dhulky lamaathy jiing ee wabiyaa Jubba ii Shabeelly,
Isbiyi qoolsheey, hadalsheey my haayny af wal luku erfi, aabaqaayoowky fanky araathy ii walbarashoothy, amangh danby hilmaameeyi rung maku e kii lahaayi waa yak y beri, iri daleel inky dheethy, qaboob yaalo kuleel daari kor huraa waaky inky beri kolkii usy araghi diidaneeghy kor ing kohoowky fanky Araathy Koonfur Galbeed, maddii yoo ii aawshoo ming waafy ingh I jaarty dowlad Goboleedky kgs, ulhaay abdiasiis hassan Mahamed Lafta gareen, inty ming wahad yoo ingleyiing Dowlaathy kol dhow inky dhisaase,
Hathalkii mathawiinaaghy bilung Agosto dhatiyii eraayi waany weeleey fuliyi isly dheegnooy kasankii kor jari ii guthaaghaany ky jary wa si yoo ing eraang hor leey inky quursithaang uniiny libinty niinky haaty.
Heestung wali habateey 2018kii, waliny habiyeey goosing faneedky iskaalithy ee walaalo bayhaw Band ii Gerboda Music Band, haanaasoo isky darsathy fikir ii aqly yeethoo taasny kydheliithy kol yoo ing riikithy waayaangh ummuty Koonfur Orsy midnimy laangtiyoo, wali dhowanghty, wali reed ku sheeny korty ii hooby lisly dohowi sithy yee wal tareengh ingky etty dadky ii dalky.
Kolka any singh laha heesky hees dhaafi, ma isky ernee wal eri, lang waaheey ma arnee ummutii dheegdeey hortiyoo luku qaathi sithy yoo inky dheg raariyeenghaa ya maatiyaasy iny heesky eyi koo lang damiir iii wadaniyad dad ii dal jeelaang ly maddii ing bedelaasoo heestung astaan qaranghu ing eraaw.
Hooby me lettaany waaku hathalkii gudoomiyighy BKG, Abduqaadir Shariif Sheekhunaa ku eri heestung ii sithy yee ing muthunghty ambooneey istaahil inky etty ini Dowlad Goboleedky Koonfur Galbeed inky naghaty hees kolkasty lahaang qaathythaaw astaan qaran umuty inis dumisy midnimithiyoo ii watha jarshoo wal tareengh maathy inky etty.
Ebedshee mi dhiiny mas’uul iny hakaha dhiiri gelinty heershee inty deeraaw iny dheghaashoo ki tifijhiyi afmaalee deegaanky hees yoo suubiyeeng, taasoo kolkii Gudoomiyi Abduqaadir Shariif Sheekhunaa maye hathalsheey ku weely too taariikty kaydka dahabighy ku giliithy doosheey kaalang Afmaalky fanky KGS meel gaar ah kiky qoreengh, ebedsheey yoo inky hilmaamy doony, tuwinaathayaang gu ii guyaaly, intiiby afmaalby jary, keer suubiyi rooghy, fanaang ed may hees qaathaaw masrah fuuly, weerty Abduqaadir Shariif ii hiilathy fanky mathywiiny Abdiasiis Laftagareen maadshoo hoo lywaayoony tuuphaaliyoo mathaasy, taariikt raageeytaa abtugty.
May siinkuku tapheeyi , taariikty feyly yee is abtughaasy ee dad ma abtughaaw sithy tan haathoow lamathy mas’uul KGS, Abdiasiis Laftagareen ii Abduqaadir Shariif Sheekhunnaa Fanka inky hiiliyeengh. Athiiny tuwunaaw taasaa isly dohoowneengh dathoow isly dohowneey, heestii dowlathy ulhaayshee inkg dooreengh iny naghaty astaanta Midnimada dad deghaaw lamaathy webi Jubba ii Shabeelle degeliithiyoo KGS. Dheghaa ing raariyi.
Mahadsantiingh.