Beesha Caalamka ayaa soo dhaweysay wadahadalka u dhaxeeyo Madaxweyne Maxamed Cabdullaahi Farmaajo iyo Madaxweyne Muuse Biixi Cabdi, oo uu martigeliyey madaxweynaha Jabuuti Ismacil Cumar Geelle, sidoo kalena uu goobjooga ka ahaa Ra’iisul Wasaaraha Itoobiya Abiy Axmed.
War-saxaafadeedka kasoo baxay beesha caalamka ayaa lagu sheegay in kulankaan uu yahay tallaabo muhiim ah oo lagu xoojinayo xiriirka iyo kobcinta isfahamka.
Sidoo kale beesha caalamka ayaa dhiiragelisay guddiyada farsamada oo ay magacaabeen labada dhinac, iyadoo ugu baaqday inay kulamadooda kasoo saaraan miro waxtar u leh dadkooda.
Beesha Caalamka ayaa sheegtay inay si weyn usoo dhaweeneyso ballan qaadka ay sameeyeen labada hoggaamiye ee Maxamed Cabdullaahi Farmaajo iyo Muuse Biixi Cabdi ee ah in lasii wadi doono wadahadallada.
Ururka Midowga Yurub oo isna maanta war kasoo saaray arrinta wadahadallada ayaa yiri, “Waa qayb muhiim ah talbaada kalsooni dhisida ee dib u heshiisiinta laguna yareynayo kala aragti duwanaanshaha, laguna horumarinayo dhismaha nabadda, barwaaqada iyo hurumarka gobolka. Djibouti iyo Itoobiya waxay cayaareen door fir-fircoon oo uu ku qabsoomay wadahalka”.
Xubnaha beesha caalamka ee war-saxaafadeedkani uu ka soo baxay ayaa kala ah:
African Union Mission in Somalia (AMISOM), Belgium, Canada, China, Denmark, Ethiopia, European Union, Finland, France, Germany, Intergovernmental Authority on Development (IGAD), Ireland, Italy, Japan, Kenya, Netherlands, Norway, Sweden, Switzerland, Turkey, Uganda, United Kingdom, United States iyo United Nations.