Madaxweynaha Galmudug Axmed Cabdi Kaariye (Qoorqoor) oo shalay gaaray degmada Hobyo ee Gobolka Mudug ayaa maanta la filayaa inuu furo shir looga hadlayo dhismaha Dekeda Hobyo.
Shirkan ayaa waxaa ka qeyb geli doona Mas’uuliyiin ka socda dowladda Federaalka, Ganacsato iyo qeybaha kala duwan ee bulshada.
Shirkan ayaa lagu soo bandhigi doona qorshayaasha u horreeya ee lagu bilaabi doono dhismaha Dekeda Hobyo oo aan weli la hirgelin.
Wasiirka Dekedaha ee Galmudug Cabdi Saabir Shuuriye ayaa dhowaan balan-qaaday in howshiisa ugu badan isugu geyn doono dhismaha Dekeda Hobyo, si Galmudug ay u yeelato Deked.
Magaalada xeebeedka Hobyo ayaa ah mid istiraatiiji ah, waxaana haddii Dekeda la hirgelinayo noqoneysa mid si weyn uga qeyb qaadata horumarka iyo kobaca dhaqaale ee Gobolada Dhexe ee Soomaaliya iyo deriska Itoobiya.
Dhismaha Dekeda Hobyo ayaa dhowr jeer oo hore loo dhagax dhigay, illaa iyo hadda lama bilaabin dhismaha, iyadoo dowladda Qatar ay balan-qaaday inay dhiseyso, waxaana labo sano ka hor dhagax dhigay Dekeda ay yeelaneyso Hobyo Madaxweyne Farmaajo.