Ra’iisul wasaaraha cusub ee Soomaaliya Maxamed Xuseen Rooble ayaa lagu wadaa in Axadda maanta uu la wareego xilkiisa oo loo dhaariyey dabayaaqadii todobaadkii hore.
Waxaa su’aalo badan la geliyey cidda sharciga u leh inay xilka ku wareejiso ra’iisul wasaare Rooble.
Qoraal kooban oo sii-hayaha wasiirka dhalinyarada Soomaaliya Khadiija Diiriye ay soo dhigtay barteeda ayey ku sheegtay in sii-haye Mahdi Maxamed Guuleed uu maanta xilka ku wareejinayo ra’iisul wasaare Maxamed Xuseen Rooble.
Khadiija Diiriye ayaa ka mid ah guddi uu dhawaan Mahdi Guuleed u magacaabay qaban-qaabada munaasabadda xil ku wareejinta ra’iisul wasaaraha cusub.
Ra’iisul wasaarihii hore ee dalka Xasan Cali Kheyre ayaa qoraal uu u diray ra’iisul wasaare Rooble, isla markaana uu ogeysiiyey madaxweyne Farmaajo, guddoonka labada Aqal ee baarlamanka, guddoonka maxkamadda sare, sii hayaha ra’iisul wasaaraha iyo hanti dhowraha Qaranka, ayuu ugu sheegay inuu diyaar u yahay in si waafaqsan sharuucda dalka iyo nidaamka dowladnimo uu ugu wareejiyo xilka, isla markaana uu la wadaago dikumiintiyo iyo warbixin Qaran.