Shirka sanadlaha ee Machadka Heritage ayaa maanta ka furmay Magaalada Djibouti ee Xarunta Jamhuuriyadda Jabuuti.
Shirkan oo noqonayo kiisii afaraad ee dalkaasi lagu qabto ayaa waxa uu sanadkan ku soo aadayaa, xilli xaalad ay ka taagan tahay Geeska Afrika.
Shirka ayaa diiradda lagu saari doonnaa xaaladda gobolka, sida dagaalka Itoobiya, xiisadda siyaasadeed ee Sudan iyo Somaliya & Kenya oo doorashooyinka ku soo fool leh uu khilaaf hareeyay, lagana cabsi qabo in daruufo keenaan.
Madasha shirka waxaa hadda ku sugan Madaxweynaha Dowlad Deegaanka Soomaalida, Mustafe Muxumed Cumar (Cagjar), Wasiirada Arrimaha Dibadda iyo Maaliyadda ee Jabuuti, Maxamuud Cali Yuusuf iyo Ilyaas Muuse Dawale. Waxa kaloo ku sugan Wasiirka Qorsheynta Somaliya, Jamaal Maxamed Xasan.
Cabdikariin Xasan Jaamac, Gudoomiyaha Guddiga Sare ee Machadka Heritage ayaa sheegay inay filayaan in Ra’iisal Wasaaraha Somaliya, Maxamed Xuseen Rooble uu kala soo qaybgalo shirka.
Sidoo kale wafdi ka kala socda Somaliland iyo Kenya ayaa lagu wadaa inay ka qaybgalaan shirkaasi.
Gudoomiyaha Guddiga Sare ee Machadka Heritage ayaa sheegay inay doonayaan in la iska wareysto, lana fahmo waxa ka socda Geeska Afrika.
