Madaxweynaha Galmudug Axmed Ducaale Geelle Xaaf oo warqad lagu qoray Luuqada engliishka u diray Beesha Caalamka ayaa Dowladda Faderaalka Soomaaliya ku eedeeyay “faragelin, qalalaaso abuurid iyo qafaalashada nidaamka doorasho ee Galmudug”.
Mudaneyaal ka tirsan labada aqal ee baarlamaanka federaalka balse uusan magacaabin ayuu sidoo kale sheegay in ay qayb ka yihiin “talaabooyinkaas dib u dhaca u keenaya” horumarka maamul goboleedka.
Ciidamo ay dowladda federaalka u daabushay magaaladda Dhuusamareeb oo uu sheegay “in ay tirro badan yihiin” ayuu daboolka ka qaaday in “loogu talagalay cabsi-gelin iyo in lagu fulinayo danaha xukuumadda”.
“Siyaasadda kala qeybinta iyo iska hor-imaadka ee DFS waxay keentay xiisado aan loo baahneyn iyo isku dhacyo kooxo hubeysan,” ayuu ku daray.
Isagoo saaxiibadda caalamka u sharaxaya sababta uu wakiilnimada ugala noqday xukuumadda, Xaaf ayaa ku kala sheegay tabashooyin ka yimid beelaha qaar iyo in dowladda ku fashilantay xalintooda.
Xaaf ayaa sheegay in ay ka go’an tahay qabashadda doorashooyinka, iyaddoo loo marayo hanaan lagu kalsoonaan karo, lawada ogol-yahay lagana qeyb-geliyey saamileyda.
“Si loo xaqiijiyo nidaam doorasho oo la hubo, xor ah, lagu kalsoon yahay xalaalna ah, waxaan ku martiqaadeynaa kormeereyaasha iyo saxaafada in ay u baahiyaan dhacdooyinka siday u soo shaac-baxaan”.
Halkaan ka aqriso qoraalka uu soo saaray Madaxweyne Xaaf.
Isbedelka ku yimid mowqifka Xaaf ee geedi-u-socodka doorashooyinka Dowlada Faderaalka Soomaaliya maamuleyso ee Galmudug ayaa kusoo aadaya iyaddoo nidaamka uu gabagabo ku dhow yahay, balse ay ku geedaaman yihiin caqabado.
Guddiga Farsamada Maamul-u-dhisidda Galmudug oo shirjaraaid ku qabtay magaalada Dhuusamareeb ayaa shalay sheegay in ay si rasmi ah u bilaaban doonto xulista xildhibaanada Baarlamaanka Galmudug.
Geesta kale Guddiga Farsamada maamul u dhisida Galmudug ayaa Odayaasha dhaqanka Galmudug Xalay Dhusamareb uga furay Tababar ku saabsan Habka loo soo xulayo Xildhibaanada cusub ee Baarlamaanka Labaad ee Galmudug.
Odayaasha aqoon kororsiga loo furay oo ah saxiixayaashii dhismaha Galmudug ayaa ka kooban 46 Oday, waxaana la bari doonaa, habka soo xulista, golaha wakiilada Galmudug.