Madaxweynaha Maamulka Hirshabeelle Maxamed Cabdi Waare iyo wafdi uu hogaaminayo ayaa gaaray Magaalada Dhuusamareeb ee Caasimadda maamulka Galmudug, iyadoo halkaas lagu soo dhaweeyay.
Madaxweyne Waare ayaa waxaa safarkiisa ku wehlinaya Mas’uuliyiin ka tirsan maamulkiisa, waxaana Garoonka Dhuusamareeb kusoo dhaweeyay Madaxweynaha Galmudug Axmed Cabdi Kaariye Qoorqoor iyo Mas’uuliyiin kale.
Ujeedka Madaxweynaha Hirshabeelle ee halkaas ayaa waxaa uu yahay sidii uu uga qeyb geli lahaa Shirka Madaxweyneyaasha maamul Goboleedyada oo maalinta Berri oo Khamiis u furmaya.
Sidoo kale inta uu ku sugan yahay Magaalada Madaxweyne Waare ayaa waxaa uu kulamo kala duwan la qaadan doonaa Madaxda ka qeyb galeysa Shirka iyo xubno kale oo ku sugan Magaalada Dhuusamareeb.
Saacad kadib ayaa waxaa la filayaa in Dhuusamareeb ay gaaran Madaxweyneyaasha Maamulada Jubbaland Axmed Madoobe, Koonfur Galbeed Cabdicasiis Lafta-gareen iyo Puntland Saciid Deni.
Ammaanka guud ee Caasimadda Galmudug ayaa Maanta siwey loo adkeeyay, waxaana Madaxweyne uu halkaas la tegayaa Ciidamo badan oo ilaalo u ah, iyadoo dhaq-dhaqaaqa Dhuusamareeb la yareeyay inta uu socdo Shirka.
Magaalada Dhuusamareeb ee Caasimadda dowlad Goboleedka Galmudug ayaa waxaa laga soo daad-gureeyay Boqolaal Askari oo ka tirsan Ciidanka Booliska dowladda ee Haramcad oo halkaas kal hore la geeyay.
Madaxweyneyaasha Maamul Goboleedyada Jubbaland iyo Puntland Axmed Maxamed Islaam Axmed Madoobe iyo Saciid Cabdullaahi Deni ayaa dalbaday in Magaalada Dhuusamareeb laga saaro Ciidanka Booliska Dowladda ee Haramcad.
Garoonka diyaaradaha Magaaladaas ayaa waxaa kasoo duushay Diyaarad sida ku dhawaad 200 oo Askari oo Booliska Haramcad, isla markaana waxaa la filayaa saacad kadib kasoo degto Garoonka diyaaradaha Aadan Cadde ee Magaalada Muqdisho.
Axmed Madoobe iyo Saciid Cabdullaahi Deni ayaa Madaxweynaha Galmudug Qoorqoor ayaa u sheegay in Ciidanka Haramcad ay yihiin kuwo ka amar qaata Xukuumadda Soomaaliya oo aysan hoos imaan Galmudug, sidaas darteedna laga saaro Caasimadda Galmudug, si ay uga qeyb galaan Shirka.
Magaalada Dhuusamareeb ayaa waxaa maalinta Berri oo Khamiis ah ka furmaya Shirka Madaxweyneyaasha maamul Goboleedyada dalka, kaasi oo looga hadli doono Arrimo kala duwan oo ku aadan xaaladda siyaasadeed ee dalka iyo qodobo kale.
Magaalada Dhuusamareeb ee Caasimadda Galmudug ayaa waxaa la filayaa inuu si rasmi ah uga dhaqan galo Bandow adeg oo lagu soo rogayo inta uu socdo Shirka Madaxweyneyaasha maamul Goboleedyada dalka oo halkaas ka furmaya.
Go’aanka Bandowga lagu saarayo Dhuusamareeb ayaa waxaa uu qeyb yahay qodobo laga saaray Shir looga hadlay Arrimaha amniga oo shalay lagu qabtay halkaas, waxaana shirka ka qeyb galay Saraakiisha kala duwan ee Ciidamada.
Saraakiil ka tirsan laamaha amniga Galmudug ayaa sheegay in Bandowga uu dhaqan geli doono Maalinta berri, isla markaana waxaa uu saameeyn ku yeelan doonaa dhaq-dhaqaaqyada Bulshada sida Ganacsiga iyo isku socodka dadka iyo aadiidka.
Madaxweyneyaasha maamul Goboleedyada dalka ayaa Maanta qaar gaaray magaaladda dhusimareeb kuwo lafilaayo inay gaaraan saacadaha soo socda t Magaalada Dhuusamareeb, si ay uga qeyb galaan Shir ay halkaas ku yeelanayan, kaasi oo looga hadli doono Arrimo kala duwan oo ku aadan xaaladda siyaasadeed ee dalka.
Ammaanka guud ee Dhuusamareeb ee Caasimadda Galmudug ayaa siweyn loo adkeeyay, waxaana inta badan Waddooyinka ku yaalla halkaas lagu arkayaa Ciidamo kala duwan oo gaadiidka baaritaano ku sameeynaya.
Wararka aan ka heleyno Garoonka diyaaradaha Magaalada Dhuusamareeb ayaa waxaa ay sheegayaan in halkaas saakay ay ka degeen diyaarado siday gaadiidka nooca xabada aan karin ee loo yaqaano Bullet-proof.
Diyaaradaha ka degay Dhuusamareeb ayaa waxaa la sheegay inay sideen ku dhawaad 4 gaadiid, isla markaana loogu talagalay in garoonka looga galbiyo Madaxweyneyaasha maamul Goboleedyada ee ku wajahan halkaas.
Talaabadan ayaa ka dambeysay, kadib markii Madaxweynayaasha Puntland iyo Jubbaland ay dalbadeen in Caasimadda Galmudug laga saaro ciidamada Booliska dowladda ee Haramcadka, kuwaas oo ay horey Magaalada ay dowladda u geysay xiligii Doorashadii Madaxweyne Qoorqoor.
Siciid Deni iyo Axmed Madoobe ayaa shuruud ku xiray sida la sheegay inay ka qeyb galaan shirka Maalinta berri Dhuusamareeb uga farmaya Madaxweyneyaasha maamul Goboleedyada, waxaana halkaas laga soo daad-gureynayaa Ciidanka Haramcad.
Wafdi hordhac u ah safarka Madaxweynaha Maamulka Puntland Saciid Cabdullaahi Deni ayaa gelinkii dambe ee Maanta gaaray Magaalada Dhuusamareeb ee Caasimadda Maamulka Galmudug.
Wafdigan ayaa waxaa qeyb ka ahaa Ciidamada gaarka ah ee Ilaalada Madaxweynaha Puntland, kuwaasi oo safar dhinaca dhulka kaga soo baxay Magaalada Gaalkacyo oo maalmihii lasoo dhaafay ay ku sugnaayeen.
Madaxweyne Saciid Deni ayaa waxaa la filayaa in maalinta berri uu gaaro Magaalada Dhuusamareeb, si uu uga qeyb galo Shirka halkaas uga furmaya Madaxweyneyaasha maamul Goboleedyada dalka.
Sidoo kale Caasimadda Galmudug ayaa waxaa isla maalinta berri tegaya Madaxweyneyaasha maamulada Jubbaland Axmed Maxamed Islaam Axmed Madoobe iyo Koonfur Galbeed Cabdicasiis Lafta-gareen.
Magaalada Dhuusamareeb ayaa waxaa ku sugan Madaxweynaha Hirshaebelle Maxamed Cabdi Waare, isla markaana waxaa amnigiisa la wareegay Ciidamo ka tirsan nabadsugida dowladda Federaalka Soomaaliya.