Sii hayaha Ra’iisul Wasaaraha dalka, Mahdi Maxamed Guuleed, ayaa maanta kulan kula qaatay Magaalada Muqdisho ee caasimadda dalka Soomaaliya laamaha kala duwan ee amniga dalka.
Kulanka oo looga hadlay adkeynta amniga dalka, ayaa Mahdi Guuleed waxuu laamaha amniga uga dhageystay warbixin la xariirka weerarkii shalay Muqdisho ka dhacay ee lagu qaaday Hotelka Elite.
Mahdi Maxamed Guuleed ayaa laamaha amniga faray inay baaritaan saxan oo dhammeystiran ku sameeyaan dhacdadii shalay, waxuuna sidoo kale ku adkeeyay in ay laba jibaaraan dadaallada lagu xoojinayo amniga dalka si ummadda Soomaaliyeed ay u helaan amni la isku halleyn karo.
Dowladda Soomaaliya ayaa markasta ku cel celisa inay ku dadaaladayaan sidii shacabka Soomaaliyeed ay u heli lahaayeen amni iyo xasilooni waarta ayaa hadana waxaa ka dhaca weeraro lagu qaado xarumo dowladood oo amnigooda siwyen loo ilaaliyo.
Geesta kale Guddoomiyaha Golaha Shacabka Maxamed Mursal Sheekh Cabdiraxmaan ayaa ka tacsiyeeyay geerida muwaaddiniintii Soomaaliyeed ee ku werarkii ka dhacay Hotelka Elite oo ku yaalla Xeebta Liido ee Magaaladda Muqdisho.
‘’Innaa lillaah wa innaa illeyhi raajicuun, waxaan murugada iyo tiiraanyada la qeybsanayaa guud ahaan shacabka Soomaaliyeed gaar ahaan qoysaskii iyo eheladii dadkii weerarkaasi argagixisinimo ku waxyeelloobay,dadkii argagixisadu ay gumaadeen ee weerarkaas ku shahiiday Ilaahay naxriistii janno haka waraabiyo, kuwii ku dhaawacmayna waxaan Alle uga baryayaa bogsiimo deg-deg ah’’ ayuu yiri Guddoomiyaha Golaha Shacabka ee BJFS.
Guddoomiyaha Golaha Shacabka ayaa Ciidamada amaanka ku amaanay sida ay usoo badbaadiyeen dadkii dhismaha Hotelka ku go’doomay ,sidoo kalena ay usoo afjareen Xubnihii ka tirsaanaa Al-Shabaab ay weerarkaasi ka dambeeyay.
Dhinaca kale, Guddoomiyaha Golaha Shacabka Maxamed Mursal Sheekh Cabdiraxmaan ayaa cambaareeyay qarax Miinado lala eegtay kolonyo uu la socday sii hayaha xilka Wasiirka waxbarashada Soomaaliya, Cabdullaahi Goodax Barre, xilli uu marayay inta u dhaxeysa Beled-Xaawo iyo Doolow , qaraxaas oo uu wasiirku ka badbaaday balse ay dhaawacyo ka soo gaareen mudanayaal ka tirsan Xildhibaannadda Golaha Shacabka,wuxuuna Guddoomiye Mursal uu caafimaad deg-deg ah u rajeeyay Xildhibaannada qaraxaas ku dhaawacmay.
Ugu dambeyn waxaa uu shacabka Soomaaliyeed ugu baaqay in ay garab istaagaan oo ay la shaqeeyaan Ciidamada Qaranka si looga guuleysto islamarkaana looga guuleysto Ururka Al-Shabaab.