Taliska Ciidanka Mareykanka ee Qaaradda Afrika (AFRICOM) ayaa war ka soo saaray tirada weerarada dhinaca cirka, ee uu dalka ka fuliyay sanadkan 2020.
Taliska AFRICOM ayaa qoraal ku sheegay in January illaa bishan August ay Somaliya ka fuliyeen 46 duqeyn, kuwaa oo lala beegsaday dhulka uu maamulo Ururka Al Shabaab.
Warka waxaa lagu sheegay in duqeymaha qaarkood lala eegtay saldhigyo/xarumo ay ka hawlgalaan maleeshiyada Al Shabaab, laguna gaarsiiyay khasaaro, inkastoo aysan warka ku muujin inta uu le’egyahay khasaarahaasi.
Sida warka lagu sheegay bishan oo keliya waxaa uu Mareykanka Gobolada Koonfurta ka fuliyay saddex weerar oo dhinaca cirka ah, isla-markaana ay ka dhaceen dhulka uu ka hawlgalo Shabaabka hubeysan.
Dhanka kale Mareykanka ayaan warkan kaga hadlin duqeymaha waxyeelada ka soo gaareen dadka rayidka, ee ay siyaabooyin kala duwan uga gaysteen Gobolada Shabellaha Hoose iyo Jubbada Dhexe, oo la fahamsan yahay in dad rayid ahi ku dhinteen, kuna dhaawacmeen.
Duqeymaha sanadkan ka dhacay Gobolada Koonfurta waxaa ugu muhiimsanaa kuwii lagu dilay Bashiir Maxamed Maxamuud (Bashiir Qoorgaab), Yuusuf Jiis iyo Cabdulqaadir Cismaan Yarow (Cabdulqaadir Kumaandoos), oo saddexduba ka tirsanaa hoggaamiye-yaasha sar sare ee Ururka Al Shabaab