Madaxweynaha Dowlada Jubaland Mudane Axmed Maxamed Islaam ayaa Hambalyo u diray Ardayda ree Jubaland ee kaalmaha hore ka galay Imtaxaanadka Dugsiga Sare ee Sanad Dugsiyeedka 2020/2021
Waxaa Madaxweynahu uu amaanay dadaalka Wasaarada Waxbarashada iyo Tacliinta Sare ee Jubaland isagoo xusay in sii hayaha ahna Wasiir ku xigeenka Wasaarada iyo howlwadeenada kale ay halkaas kasii wadaan dadaalka ay ugu jiraan in Tacliinta iyo barbaarinta Ubadka uu noqdo mid ahmiyad gaar ah la siiyo.
Madaxweynaha ayaa si gaar ah ugu mahad celiyay Macalimiinta iyo waalidka ardayda kaalmaha hore galay sidii ay ugu dadaaleen Mustaqbalka ardayda iyagoo wakhti iyo dadaal dheer ku bixiyay sidii ay halka ay maanta joogaan usoo gaari lahayeen.
Madaxweynaha ayaa balan qaaday in lasii kordhin doono tasiilaadka ay Dowladu ku bixiso dhinacyada Waxbarashada iyo hormarinta Bulshada si ay usoo baxaan jiil Aqoon ku hogaamiya Mustaqbalka Shacabka ree Jubaland.
Geesta kale Maamulka Jubbaland ayaa soo dhoweysay natiijada imtixaanka dawliga ah ee laga qaaday ardada dugsiyada sare dhammaysay sanad dugsiyeedka 2019/2020-ka ee ay maanta shaacisay Wasaaradda Waxbarashada Xukuumadda Soomaaliya, waxayna hambalyada farxada la wadaageen dhammaan ardayda kaalmaha hore ka galay imtixaamka gaar ahaan ardayda ka soo jeeda deegaanada Jubbaland.
Agaasimaha Waaxda Tacliinta sare iyo Farsamada Wasaaradda Waxbarashada maamulka Jubbaland Axmed Faarax Cali Aweys oo la hadlay warbaahinta Qaranka ayaa marka hore uga mahadceliyay Wasaaradda Waxbarashada Soomaaliya xilka weyn ay iska saartay shaqada ay qabatay, ee u soo jeeday Habeenada badan, isagoona marka labaad u hambalyeeyay ardayda Soomaaliyeed oo dhan intii imtixaamka sanad Dugsiyeedka 2019/2020-ka.
“Aad iyo Aad baan ugu faraxsanahay,waxaan horta u mahad celinayaa Wasaaradda Waxbarashada ee Dowladda Federaalka xilka weyn ayay iska saartay shaqada ay qabata ee u soo jeeday Habeenada badan, marka labaad waxaa u mahad celinayaa ardayda Soomaaliyeed oo dhan intii imtixaanka gashay sanad Dugsiyeedka 2019/20,” ayuu yiri Agaasime Axmed Faarax Cali Aweys.
Sidoo kale, Agaasimaha oo sii hadlaya wuxuu yiri“ Waxaan si gaar ah ugu faraxsanahay haddaan nahay reer Jubbaland guusha weyn ee aynu ka gaarnay imtixaamka ay Dowladda Federaalka Soomaaliya qaaday anaguna aan ku kaalmeyneynay oo aan u fududeyneynay, aad baan ugu faraxsanahay waana soo dhoweyneynaa,”
Ugu dambeyntii, Agaasimaha Tacliinta sare iyo Farsamada Wasaaradda Waxbarashada maamulka Jubbaland Axmed Faarax Cali Aweys wuxuu dhiiragelin ku aadan iney sii laba jibaaraan dadaalkooda u jeediyay ardaydii sanadkan u suurageli weysay iney ka gudbaan imtixaamka ama baasaan.