Ciidanka Kumaandooska Danab ayaa maalintii lixaad hawlgalo ka wada deegaano ka tirsan Gobolka Mudug, ka dib dagaalkii dadka badani ku dhinteen ee maleeshiyada Al Shabaab maalintii Jimcaha ku qaadeen tuulada Shabellow, oo ka tirsan deegaanka Bacaadweyn ee Gobolka Mudug.
Ciidanka Kumaandooska Danab ayaa hawlgaladan ka wada tuulooyinka hoos-tagga deegaanada Bacaadweyn iyo Caad, iyagoona ka baadigoobaya maleeshiyaad ka tirsan Al Shabaab.
Kumaandooska Danab ayaa waxaa hawlgaladan ku wehlinaya Ciidanka Xoogga Dalka ee Qaybta 21aad.
Ciidamada ayaa gelinkii dambe ee Arbacadii la wareegay gacan ku haynta deegaanka Dhagaxley, oo qiyaastii 20km u jira deegaanka Cammaara ee Gobolka Mudug.
Dadka deegaanka ayaa sheegay in ciidamada ay ku daba jiraan maleeshiyadii Shabaabka, ee laga saaray deegaankaasi.
Hawlgalada ka socda Gobolka Mudug waxaa ay ku soo aadayan, xilli Galmudug ay isu diyaarineyso guluf ka dhan ah maleeshiyada Al Shabaab, ee ku sugan Gobolada Dhexe.