Midowga Yurub ayaa sheegay in ay xayiraad dhanka socdaalka ah iyo xayiraad dhanka hantida ah ku soo rogeen shan sarkaal oo Mali ka tirsan, oo ay ku jiraan taliyayaal sare oo militari oo qaaday afgambiga sannadkii hore – kuwaas oo qayb ka ah hoggaamiyihii milatariga Assimi Goïta ee gudaha.
Arrintan ayaa lagu dhawaaqay kadib markii ciidamada milateriga ay ka baxeen balan qaad ahaa in bishan la qaban doono doorasho, taas bedelkeedana ay dib u dhac ku yimid afar sano.
Shantu waa:
Choguel Kokalla Maïga, ra’iisul wasaaraha ku meel gaarka ah
Col Malick Diaw, madaxweynaha golaha ku meel gaadhka
Col Ismaël Wagué, wasiirka dib u heshiisiinta – iyo ninkii ku dhawaaqay afgambiga Ogosto 2020
Adama Ben Diarra, oo sidoo kale loo yaqaan “Ben le Cerveau”
Ibrahim Ikassa Maïga, oo ah xubin rayid ah oo ka tirsan dowladda ku meel gaarka ah.
Xidhiidhka u dhexeeya EU iyo Mali ayaa hoos u dhacay, waxaana qayb ahaan sabab u ah afgambigii labaad ee dalkaas ka dhacay tan iyo 2020 iyo go’aanka Mali ay ku shaqaalaysiisay qandaraasleyaal amni oo Ruush ah.
Waddamada Yurub oo uu ku jiro Faransiiska ayaa ka fikiraya in ay kala baxaan ciidamada ku jira cutubka dagaalka kula jira kooxaha Islaamiyiinta ah.
Bishii hore, ururka Ecowas ee gobolka ayaa cunaqabatayn kusoo rogay Mali, kuwaas oo ay ka mid yihiin in la xayiro hantida dalkaas ee bangiyada ganacsiga ee dalalka xubnaha ka ah iyo in la joojiyo dhaq-dhaqaaqyada maaliyadeed ee aan muhiimka ahayn.