Ra’iisul Wasaaraha Xukuumadda Federaalka Soomaaliya, Xamse Cabdi Barre, ayaa la kulmay wafdi sare oo ka socda dowladda Ciraaq, kuwaasi oo uu horkacayo Wasiirka Arrimaha Gudaha ee dalkaasi, Cabdul Amiir Al-Shammari.Kulanka ayaa si gaar ah diiradda loogu saaray xoojinta xiriirka walaaltinimo ee Soomaaliya iyo Ciraaq, iyadoo laga hadlay sidii loo horumarin lahaa iskaashiga dhinacyada amniga, la-dagaallanka AS iyo Daacish, tababarrada ciidamada iyo isdhaafsiga khibradaha.Ra’iisul Wasaaraha ayaa soo dhaweeyay Wasiirka iyo wafdigiisa, isagoo ku bogaadiyay booqashada ay ku yimaadeen Soomaaliya, taasoo uu tilmaamay inay tahay tallaabo muhiim ah oo lagu xoojinayo wada-shaqeynta iyo iskaashiga labada dal.“Booqashadan iyo kulankani waa fursad muhiim ah oo lagu ballaarin karo iskaashiga labada dal ee dhinacyada kala duwan. Waxay sidoo kale muujinaysaa sida ay Soomaaliya u xoojinayso xiriirkeeda caalami ah, gaar ahaan dhinaca amniga iyo horumarka.” ayaa lagu yiri qoraal ka soo baxay Xafiiska Ra’iisu wasaaraha.Dhankiisa, Wasiirka Arrimaha Gudaha ee Ciraaq, Cabdul Amiir Al-Shammari, ayaa sheegay in dowladdiisa ay si weyn uga go’an tahay in ay taageerto Soomaaliya, isagoo ballan qaaday in la dar-dar gelinayo iskaashiga labada dal, gaar ahaan dhinacyada amniga, socdaalka, waxbarashada iyo tababarrada laamaha ammaanka.Booqashadan iyo kulanka dhex maray Ra’iisul Wasaaraha iyo Wasiirka Ciraaq waxay muujinayaan sida labada dal ay uga go’an tahay xoojinta xiriirka iyo iskaashiga, taasoo ka tarjumeysa sida ay muhiimka ugu tahay amniga iyo horumarka gobolka.
