Waxaa maanta dib shaqadiisii u bilaabay garoonka dayuuradaha degmada Dayniile ee gobolka Banaadir oo muddo dheer xirnaa.
Garoonka ayaa waxaa maanta soo caga dhigatay dayuuradii ugu horeysay muddo 14 sano ka dib, taasoo ka qaaday dad rakaab ah oo ku sii jeeday gobolada dalka qaarkood.
Bus ay leedahay dowlada Hoose ee Muqdisho ayaa lagu geeyey garoonka rakaabka maanta ka dhoofay, waxaana dib u howlgelinta garoonka ansixiyey dowlada Somalia iyo maamulka gobolka Banaadir.
Garoonka oo mudooyinkan lagu waday dayactir ayaa la sheegay in loo dhameystiray adeegyadii uu u baahnaa, iyadoo rakaabka la siinayey agabka loogu talo galay ka hortaga cudurka COVID-19.
Duulimaadyada garoonkan ayaa u kala gooshi doona oo kaliya gobolada dalka, mana jiri doono duulimaad dibeda ah oo ka soo degaya ama u dhoofaya sida ay sheegeen saraakiisha garoonka.
Garoonka dayuuradaha degmada Dayniile ayaa waxaa hirgeliyey 20 sano ka hor xiligii hogaamiye kooxeedyada marxuum Maxamed Qanyare Afrax oo soo noqday Xildhibaan iyo Wasiir, waxaana garoonkan shaqo ugu dambeysay sanadkii 2006 markii ay caasimada Muqdisho iyo qeybo ka mid ah dalka la wareegeen Midowgii Maxaakiimta islaamiga ee markii dambe awoodooda la wiiqay.
