Weerar ismiidaamin ah oo lagu qaaday masaajid ku yaal magaalada Kunduz ee dalka Afgaanistaan ayaa lagu dilay ugu yaraan 50 qof, sida ay saraakiishu sheegeen, waana weerarkii ugu dhimashada badnaa tan iyo markii ay ciidamada Mareykanka baxeen.
Waxaa la arkay meydad ku daadsan gudaha masaajidka Saciid Cabaad, oo ay adeegsadaan bulshada Muslimiinta Shiicada ah ee laga tirada badan yahay.
In ka badan 100 qof ayaa ku dhaawacmay qaraxa ka dhacay magaalada waqooyiga.
Ma jirto koox sheegatay inay ka dambaysay weerarka, laakiin xagjiriinta Muslimiinta Sunniga ah, oo ay ku jiraan kooxda maxalliga ah ee Dawladda Islaamka, ayaa beegsada bulshada Shiicada.Waxay u haystaan muslimiinta shiicada inay yihiin bidco.
IS-K, ee kooxda Dawladda Islaamiga ah ee sida xooggan uga soo horjeeda Talibanka talada haya, ayaa dhawr jeer qaraxyo ka fuliyay, inta badan bariga dalka.
Saraakiisha amniga deegaanka ayaa Tolo News ka soo xigatay in in ka badan 300 oo qof ay salaadda ka qaybgalayeen markii weerarku dhacay.
Inkasta oo aysan jirin sheegashada mas’uuliyadda illaa hadda, haddana weerarkan wuxuu xambaarsan yahay dhammaan astaamihii IS-K, oo ahaa kooxdii bartilmaameedsatay gegida diyaaradaha ee Kabul duqeyn ba’an bishii Ogosto.
Kooxda ayaa dhowr jeer oo hore bartilmaameedsatay Shiicada laga tirada badan yahay ee Afganistan, iyadoo qaraxyo ismiidaamin ah ay ka dhaceen masaajidda, naadiyada isboortiga iyo dugsiyada.
Toddobaadyadii la soo dhaafay, IS ayaa sidoo kale kordhisay ololaha weerarrada ka dhanka ah Taliban.
Weerarka Jimcihii, haddii ay fulisay IS, waxay calaamad u noqon doontaa in dhaqdhaqaaqyadooda ay ku sii fidayaan waqooyiga dalka.
Daalibaan ayaa sheegtay inay xireen daraasiin ka tirsan kooxda IS waxaana la rumeysan yahay inay dileen kuwo kale oo looga shakisan yahay inay xiriir la leeyihiin kooxda.
Dad badan oo reer Afgaanistaan ah ayaa rajeynayey in la wareegidda Taliban ay ugu yaraan ku dhawaaqi doonto nabad, haddii ay tahay mid awood leh. Laakiin IS waxay u taagan tahay khatar weyn oo ku wajahan ballanqaadkii Taliban ee ahaa hagaajinta amniga.
