Madaxweynaha Soomaaliya Xasan Sheekh Maxamuud ayaa Madaxtooyada Villa Soomaaliya ku qaabilay saraakiil sare oo ka tirsan dowladda UK, kuwaas oo kala hadlay xaaladda siyaasadeed iyo amni ee dalka, iyadoo ay xilli horeba socdaan dadaallo lagu doonayo in dowladda iyo mucaaradku ka gaaraan heshiis ku saabsan doorashooyinka.
Wafdiga UK waxaa hoggaaminayay Charlotte Pierre, oo ah agaasimaha Arrimaha Afrika ee Wasaaradda Arrimaha Dibadda, Barwaaqo-sooranka iyo Horumarinta UK (FCDO), waxaana sidoo kale kulanka ka qeyb galay safiirka Britain ee Soomaaliya, Charles King.
Sida lagu sheegay wararka ka soo baxay dhinacyada kulanka, waxaa diiradda lagu saaray muhiimadda ay leedahay in Soomaaliya laga hirgeliyo wada-hadal siyaasadeed oo loo dhan yahay, isla markaana Soomaalidu ay si buuxda ula wareegaan mas’uuliyadda iyo maaraynta amniga dalkooda, xilli uu socdo qorshaha kala-guurka amniga.
UK ayaa sheegtay in mustaqbalka Soomaaliya ay tahay in ay Soomaalidu iyagu qaabeeyaan, iyadoo ballanqaadday inay sii wadi doonto taageerada ay siiso hoggaanka Soomaaliya iyo saaxiibbada caalamiga ah si loo gaaro dal amni, xasillooni iyo barwaaqo leh.
Kulanka ayaa sidoo kale lagu soo qaaday diyaar-garowga saameynta El Niño iyo baahiyaha bani’aadannimo ee dalka, iyo dadaallada lagu xoojinayo hay’adaha dowladda.
Kulankan ayaa imaanaya iyadoo UK, Mareykanka, Midowga Yurub iyo Turkiga ay qeyb ka yihiin dadaallada diblomaasiyadeed ee lagu doonayo in dowladda Federaalka iyo mucaaradku ay dib ugu laabtaan wada-hadal, si xal looga gaaro khilaafka siyaasadeed iyo hannaanka doorashooyinka dalka.
Madaxweynaha Soomaaliya, Xasan Sheekh Maxamuud, ayaa sida laga soo xigtay xubno kamid ah Golaha Samatabixinta Qaranka, wuxuu muujiyay inuu diyaar u yahay inuu wada-hadal la yeesho mucaaradka, si gogosha siyaasadeed ee taalla loogu beddelo fursad lagu gaaro heshiis qaran.
Mucaaradka oo xalay iyo maanta kulamo gaar ah ku lahaa magaalada Muqdisho weli wax war ah kama soo bixin kulamadooda.

