Dowladda Federaalka Soomaaliya iyo Midowga Yurub ayaa magaalada Brussels ee dalka Belgium ku yeeshay shir heer sare ah oo diiradda lagu saaray qorshaha Soomaaliya ee kala-guurka amniga iyo sidii ay dowladda Soomaaliya si buuxda ula wareegi lahayd mas’uuliyadda amniga dalka.
Shirka oo ay ka qaybgaleen mas’uuliyiin ka kala socday 50 dal, dowladaha safka hore iyo ururro caalami ah iyo kuwo goboleed, ayaa looga hadlay xaaladda amniga Soomaaliya, qorshaha dowladda ee mustaqbalka amniga iyo doorka ay saaxiibbada caalamiga ahi ku yeelanayaan taageerada ciidamada iyo hay’adaha amniga dalka.
Wasiirka Gaashaandhigga Soomaaliya, Axmed Macallin Fiqi, oo ka hadlay furitaanka shirka, ayaa soo bandhigay marxaladda uu marayo geeddi-socodka kala-guurka amniga, isagoo sheegay in loo baahan yahay iskaashi iyo taageero caalami ah si Soomaaliya ay ula wareegto mas’uuliyadda amnigeeda, iyadoo la tixgelinayo mudnaanta iyo baahiyaha dalka.
Sidoo kale, la-taliyaha sare ee Madaxweynaha ee arrimaha difaaca, Jihan Cabdullaahi Xasan, ayaa shirka ku soo bandhigtay aragtida iyo istiraatiijiyadda dowladda ee ku aaddan kala-guurka amniga, iyadoo faahfaahin ka bixisay qorshaha Soomaaliya ee la wareegidda mas’uuliyadda amniga.
Kulanka waxaa sidoo kale ka qaybgalay mas’uuliyiin sare oo ka tirsan Midowga Yurub, Midowga Afrika iyo Qaramada Midoobay, kuwaas oo ay ka mid ahaayeen Olof Skoog, Annette Weber, El Hadji Ibrahima iyo Graham Maitland.
Mas’uuliyiintii shirka ka hadashay ayaa soo dhaweeyay qorshaha ay dowladda Soomaaliya soo bandhigtay, iyagoo carrabka ku adkeeyay muhiimadda ay leedahay sii wadidda iskaashiga caalamiga ah ee lagu taageerayo geeddi-socodka kala-guurka amniga Soomaaliya.
Shirkan ayaa ku soo beegmaya xilli Soomaaliya ay waddo qorshe ay kula wareegayso mas’uuliyadda amniga dalka, iyadoo taageerada iyo doorka saaxiibbada caalamiga ahi ay weli qayb ka yihiin hannaankaas.

