–Dowladda Hindiya ayaa sheegtay in seddax askari oo ciidamadeeda ka tirsan ay ku geeriyoodeen is rasaaseyn dhex martay ciidamada ilaalada xaduudaha Hindiya iyo Shiinaha.
War kasoo baxay wasaaradda gaashaandhigga Hindiya ayaa lagu sheegay in ciidamada Shiinaha ay rasaas huwiyeen sarkaal ka tirsan ciidamadooda xaduuda joogay iyo ilaaladii la socotay.
Waxaana warkaan lagu sheegay in sidoo kale khasaare la gaarsiiyay ciidamada Shiinaha, waxaana weerarkaan uu ka dhacay magaalada la yiraahdo Ladakh oo ka tirsan gobolka Kashmiir.
Dhanka kale afhayeen u hadlay wasaaradda arrimaha dibbadda Shiinaha oo la yiraahdo Shoo Lijiyaan ayaa u sheegay wakaaladda wararka AFP in ciidamada Hindiya ay si sharci darro ah uga gudbeen xaduuda rasaasna u rideen dhanka ciidamadooda, taasna ay keentay inay jawaabaan.
Dowladda Shiinaha waxay ka gaabsatay inay ka hadasho khasaaraha dhankooda kasoo gaaray iska hor imaadkaas.
Labada dowladood ee Shiinaha iyo Hindiya waayihii dambe waxaa u dhaxeeyay muran la xariira dhanka xaduuda ay wadaagaan labada dal.
