Alle ha u naxariistee waxaa xalay Magaalada Baydhabo ee Xarunta Gobolka Baay lagu dilay Guddoomiyihii Ururka Naafada Dowlad Goboleedka Koonfur Galbeed, kaas oo lagu Magacaabi jiray Shariif Mukhtaar Jiis.
Dad ku suganaa goobta dilku kadhacay ayaa u xaqiijiyay warbaahinta warsan waxay u sheegeen in rag ku hubeysnaa Bustoolado ay mas’uulka ugu tageen Hooygiisa oo ku dhex yaalla Xero barakac oo ku taalla Magaalada Baydhabo,isla markaana dhowr xabadood ku dhufteen, iyaga oo goobta ka baxsaday.
Guddoomiyihii Ururka Naafada Dowlad goboleedka Koonfur Galbeed Shariif Mukhtaar Jiis oo kamid ah dadka baahiyaha gaarka qaba ayaa waxaa mas’uuliyin ka tirsan Koonfur ay sheegeen in Bartamihii Sanadkii 2018 Kooxo hubeysan ay dhaawaceen,hayeeshee uu ka caafimaaday.
Wasiirka Wasaaradda Warfaafinta Dowlad Goboleedka Koonfur Xasan Cabdi Maxamed (Ugaas Xasan ) ayaa uga tacsiyadeeyay eheladiisa Guddoomiyihii Ururka Naafada ee xalay la dilay, isaga oo sheegay in maalin ka hor ay wada kulmeen,isla markaana dilkiisa uu aad uga naxay.
Al-Shabaab ayaa war ay ka soo saartay dilka Guddoomiyaha Ururka Naafadda Koofur Galbeed ku sheegatay mas’uuliyadda dilkaas.
Warka Al-Shabaab ka soo baxay ayaa sidoo kale lagu sheegay inuu ninkaas ka tirsanaa Ciidamada Booliska, isla markaana uu ahaa Kornel ka tirsan waaxda dambi baarista CID-da.
Magaalada Baydhabo ayaa muddooyinkii u dambeeyay xaaladeeda amniga wanaagsaneyd, iyadoo in muddo ah aanay ka dhicin dilalka gaadmada ee ay fuliyaan kooxaha hubeysan
