Dib u dhac ayaa ku yimid Shirkii maanta lagu waday in uu ka furmo Magaalada Dhuusamareeb ee Caasimadda Galmudug ee horay ay ugu balameen maamul goboleedyadda iyo dowladda dhexe.
Madaxweynaha dowlad Goboleedka Galmudug Axmed Cabdi Kaariye Qoorqoor ayaa shaaciyay in Magaalada Dhuusamareeb uu ku dhacayo wejiga saddexaad ee shirka Madaxda dowladda Federaalka iyo kuwa maamul Goboleedyada.
Madaxweyne Qoorqoor ayaa sheegay in Maanta ay Dhuusamareeb tegayaan qaar kamid ah wufuuda ka qeyb galeysa shirka, isla markaana maamulkiisa uu u diyaar garoobay soo dhaweynta Madaxda.
“15-August oo aan ku balansaneen Shirkii Dowlada Faderaalka iyo Dowladaha Xubnaha ka ah, wuu dhacayaa shirku, waxaana Dhuusamareeb imaanaya Wufuudii ugu soo horeysay, kuwa nasoo gaari waayana iyagan waa imaanayaan oo waa sugeynaa, Reer Galmudug waa diyaar garoobeen waana soo dhowaynayaan dhamaan martida.” ayuu yiri Qoorqoor.
Maanta oo sabti ayuu qorshahu ahaa in Magaalada Dhuusamareeb ee Caasimadda Galmudug uu ka furmo Shirka Madaxda dowladda Federaalka iyo dowlad Goboleedyada, hayeeshee ma jiro wax wafuud ah oo ka qeyb galeysa shirkaas oo halkaas gaaray.
Shirka ayaa waxaa looga hadli lahaa Arrimaha siyaasadda dalka gaar ahaan Arrimaha Doorashooyinka, xili soo talo-bixinta Doorashada loo saaray Guddiyo farsamo oo ay soo magacaabeen Maamul goboleedyada iyo dowladda Federaalka.
Dhanka kale Madaxda maamulada Hirshabeelle iyo Koonfur Galbeed ayaa ku wajahan Magaalada Dhuusamareeb ee Caasimada Galmudug.
Madaxda ayaa ka qeyb gali doonna Shirka Dhuusamareeb 3 ee 17 bishaan ka furmi doona Dhuusamareeb.
Wasiiro ka tirsan maamulka Hirshabeelle ayaa xaqiijiyay in Madaxweynaha Hirshabeelle Maxamed Cabdi Waare iyo Gudoomiyaha gobolka Banaadir ay maanta ka ambabixi doonaan Muqdisho.
Shirka ayaa waxaa ku yimid dib dhac maadaama maanta lagu waday in uu furmo.
Madaxweynaha Soomaaliya Maxamed Cabdullaahi Farmaajo, Madaxweynaha Hirshabeelle, Koonfur Galbeed ayaa maanta tagi doona Dhuusamareeb.
Waxaa sidoo kale lagu waddaa in ay gaaraan Guddiga ka baarandegga arrimaha doorashooyinka ee maalmihii lasoo dhaafay ku shirsanaa Muqdisho.
Madaxweynaha Galmudug Axmed Cabdi Kaariye Qoorqoor ayaa sheegay in Shirka uusan baaqan ee uu furmi doono maalmaha soo socda, islamarkaana maanta Magaalada ay kusoo wajahan yihiin Wafuud kala duwan.
Ammaanka Magaalada Dhuusamareeb ayaa si weyn loo adkeeyay , iyadoo maalmihi lasoo dhaafay ay ka socdeen howgallo.
