Madaxweynaha Dowladda Soomaaliya Maxamed Cabdullaahi Farmaajo ayaa tacsi u diray dhammaan ehelada dadkii ku dhintay iyo kuwa ku dhaawacmay qaraxa iyo weerarka tooska ah ee weli ka socda hotelka Elite ee ku yaala magaalafa Muqdisho.
War qoraal ah oo ka soo baxay Madaxtooyadda Soomaaliya ayaa looga hadlay qaraxa.
Hoos ka akhriso qoraalka:-
Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo ayaa ka tacsiyeeyey geerida muwaadiniinta Soomaaliyeed ee argagixisadu ay sida gaadmada ah ugu laayeen mid ka mid ah hoteellada ku yaala Xeebta Liido ee magaalada Muqdisho.
Madaxweynaha ayaa tilmaamay murugada uu leeyahay falkan arxan darrada ah maadaama cadowgu ay doonayaan in ay ku dhibaateeyaan kobaca amniga, dhaqaalaha iyo xasiiloonida Caasimadda oo dadaal badan la geliyey.
“Ujeedka ugu weyn ee argagixisadu ay u qaadayaan weeraradan gaadmada ah waa in ay niyad jabiyaan shacabka Soomaaliyeed ee ka soo kabanaya duruufaha adag. Waa xaqiiq in qorshahoodu uu yahay mid lagu dhibaateynayo qof kasta oo Soomaaliyeed iyadoo la adeegsanayo qaar ka mid ah dhallinyarada Soomaaliyeed ee la marin habaabiyey.”
Madaxweynaha Jamhuuriyadda ayaa Alle u weydiiyey caafimaad deg-deg ah dhammaan muwaadiniinta ku dhaawacmay weerarkan argagixisanimo, isagoona ugu baaqay shacabka in ay garab istaagaan walaalahooda ay argagixisadu dhibaateeyeen
Geesta kale Madaxweyneyaashii hore ee Soomaaliya Sheekh Shariif Sh Axmed iyo Xasan Sheekh Maxamuud ayaa si kulul u Cambaareeyay weerarkii qaraxa ku bilowday ee shalay lagu qaaday Hotelka Elite ee ku yaalla xeebta Liido ee Magaalada Muqdisho.
Xasan Sheekh iyo Sheekh Shariif ayaa tacsi u diray dhammaan qoysaska iyo ehelada dadkii ku geeriyooday weerarkii Al-shabaab ay ku qaadeen Hotelka Elite, iyagoo kuwa ku dhaawacmay Alle uga baryay inuu Caafimaad Deg-deg ah siiyo.
“Waxaan aaminsanahay in Alshabaab laga xoreyn karay dalka, laakiin nasiib darro dowladdeenna waqtigu kasii dhamaanayo wax xil ah iskama saarin, iyadoo waqtiga ugu badan geliyey abuurista qalalaase siyaasadeed, mid amni iyo sidoo kale raadinta muddo kororsi aan sharci ahayn” ayuu yiri Sheekh Shariif.
“Dad qiima badan ayaan ku weynaa markasta weerrada Al-shabaab ee shabaabku ay ka geystaan dalka gaar ahaan magaalada Muqdisho waxaan lee yahay dadka Soomaaliyeed ha u midoobaan sidii ay naftooda iyo tan dadkooda uga bad baadin lahaayeen cadowgaas umadda Soomaaliyeed” ayuu yiri Xasan Sheekh.
Ugu yaraan 16 qof ayaa ku geeriyootay weerarkii gelinkii dambe ee shalay lagu qaaday Hotelka Elite ee xeebta Liido, waxaana ku dhaawacmay 13 qof, kuwaasi oo la geeyay Xarun Caafimaad, iyadoona weerarka laga soo badbaadiyay dad ku dhow 300 oo qof.