Deegaanka Qalaanqalle ee gobolka Galgaduud waxaa lagu dilay nin oday ah oo ka mid ahaa dadka deegaanka salaadii Makhrib kadib ee xalay, waxaana saakay halkaas ka taagan xiisad colaadeed.
Dilka marxuumkaas waxaa geystay koox reer miyi ah oo ku hubeysnaa qoryaha AK-47-ka, sida ay noo sheegeen dad ka ag dhawa halka uu dilkaasi ka dhacay.
Deegaanka Qalaanqalle ayaa waqooyi uga beegan magaalada Dhuusamareeb ee caasimadda dowlad goboleedka Galmudug, waxaana halkaas ka taagneed waayihii dambe xiisad u dhaxeysay laba beelood oo ka soo kala jeeda magaalooyinka Cadaado iyo Dhuusamreeb ee gobolka Galgaduud.
Qalaanqalle waxaa horay uga dhacay dagaallo u dhaxeeyay labadaas beelood, waxayna iska dileen dad badan, iyadoo waan-waan laga dhex waday ay hadda u muuqato mid guul dareysatay.
Dilka ninkaas ee ka dhacay Qalaanqalle kadib koox hubeysay oo wadata gaari ayaa weerar ku qaaday dad ku caweynayey maqaaxi ku taalla deegaanka Mareergur oo dhaca inta u dhaceysa Dhuusamareeb iyo Cadaado.
Inta la xaqiijiyey todoba qofood ayaa lagu dhaawacay weerarkaas, hal qof kalena goobta ayuu ku geeriyooday, sida ay noo sheegeen mas’uuliyiinta deegaankaas, waxaana baxsaday kooxdii weerarkaas geysatay.
Weerar khasaare badan geystay oo ka dhacay deegaanka Mareergur
Warar aan ka heleyno deegaanka Mareergur oo dhaca inta u dhaxeysa magaalooyinka Cadaado iyo Dhuusamareeb ee gobolka Galgaduud waxay sheegayaan in xalay halkaas uu ka dhacay weerar ay dad rayid ah u geysatay koox hubeysan.
Kooxdaas oo wadatay gaari kuwa raaxada ah ayaa rasaas ku furtay dad shacab ah oo ku sugnaa goob maqaaxi ah, sida ay noo sheegeen dad ku sugan Mareergur.
Inta la hubo Todoba qof ayaa ku dhaawacmatay weerarkaas, waxaana jira dhimashada hal ruux, iyadoo kooxdii weerarka geysatay ay goobta isaga baxsadeen.
Dhaawacyada ayaa loo soo qaaday isbitaalada magaalada Dhuusamareeb, waxayna shaqaaqadan dhacday xilli deegaanka Qalaan-qalle oo waqooyi galbeed uga beegan Mareergur lagu dilay nin oday ah salaadii Makhrib kadib ee xalay.
Qalaanqalle horay waxaa uga taagnaa xiiday u dhaxeysay laba beelood oo kasoo kala jeeda magaalooyinka Cadaado iyo Dhuuamareeb ee gobolka Galgaduud, waxaana saakay ka jirta cabsi xoog leh oo laga qabo inay dagaalamaan labada maleeshiyo beeleed.
