Taliska Militariga Mali ayaa maanta oo Sabti ah bilaabay wadahadal labo maalmood socon doona oo ay la yeelanayaan, Bulshada Rayidka, Xisbiyada mucaaridka iyo Qurbo-joogta oo looga hadlayo muddada ay militariga xilka ku wareejin doonaan dowlad shibil ah.
Shirkan oo lagu waday inuu dhaco todobaadkii hore ayaa dib u dhacay kadib markii militariga iyo xoogaga mucaaridka isku khilaafeen kaalinta ay ku yeelan doonaan wadahadalkan.
Qodobka ugu muhiimsan oo shirkan looga hadlayo ayaa ah inta ay qaadan doonto xil wareejinta Militariga Inqilaabka kula wareegay awooda dalkaasi.
Militariga ayaa markii hore sheegay inay doonayaan muddo 3 sano ah in lasiiyo inta ay xilka ku wareejinayaan, balse hada ayey sheegeen inay diyaar u yihiin in 2 sano xilka ku wareejiyaan.
Mucaaridka ayaa iyagu sheegay in xil wareejinta ku dhacdo muddo ah 18 illaa 24 bilood.
Askarta afgembiga xukunka ku qabsaday ayaa cadaadis xoogleh kala kulmaya Beesha Caalamka iyo dalalka Jaarka la ah Mali oo xayiraad kusoo rogay.
Geesta kale Hoggaamiyaha dalka Mali oo Isbitaalka ku booqday madaxweynihii hore ee dalkaasi oo xaalad caafimaad darro ay soo wajahday
Hoggaanka militeriga dalka mali oo cisbitaalka ku booqday madaxwaynihii talada ay ka tureen oo xaalad caafimaad wajahaya.
Hoggaamiyaha militeriga taabacsan ee dhawaan la wareegay talada dalka Mali Assimi Goïta ayaa Isbitaalka ku booqday madaxwaynihii talada laga tuuray ee daka Mali Ibrahim Abuubakar Kieta, kaas oo saacado ka hor xaalad caafimaad darro ay la soo daristay.
Assimi Goïta ayaa wakaaladda wararka ee AFP waxaa uu u sheegay in madaxwaynaha xaaladiisa lala tacaalayo, maadaama uu xabsiga ku jiray.
Waxa uu sidoo kale sheegay hoggaamiyaha dalka Mali in hadii loo baahdo in dibadda xaaladiisa wax looga qaban karo ay u fududayn doonaan.
Madaxwaynaha talada laga tuuray Ibrahim Abuubakar Kieta ayaa waxaa Isbitaalka loola cararay kadib markii dhiig uu maskaxda kaga furmay,sida ay qorayaan warbaahinta gudaha ee dalka.
