Qarax weyn ayaa la soo sheegayaa inuu ka dhacay magaalada Kismaayo ee gobolka Jubada hoose sida ay sheegayaan wararka halkaas naga soo gaaraya.
Warka ayaa intaas ku daraya in qaraxa uu ka dhacay nawaaxiga masaajid ku yaalla magaalada Kismaayo.
Weriyeyaal ku sugan magaalada Kismaayo ayaa sheegaya in qaraxa uu ahaa mid ismiidaamin ah oo uu fuliyey qof soo xirtay waxyaabaha qarxa
Ciidamada amaanka maamulka Jubbaland ayaa xiray goobta uu qaraxu ka dhacay halkaasoo ay ka wadaan baaritaano, lamana oga illaa hadda khasaaraha ka dhashay qaraxan
Waxaa soo baxaya faahfaahino ku saabsan qarax ismiidaamin ah oo maanta ka dhacay magaalada Kismaayo ee gobolka Jubada hoose kaasoo geystay khasaare iskugu jira dhimasho iyo dhaawac.
Qaraxa ayaa ka dhacay masjidka Qadiim ee magaalada Kismaayo hortiisa ka dib markii uu halkaas isku qarxiyey qof xirnaa jaakad laga soo buuxiyey waxyaabaha qarxa.
Waxaa qaraxaas ku dhintey dhowr qofood oo uu ku jiro Guddoomiyaha rugta ganacsiga Jubbaland Shaafi Raabi Kaahin, waxaana ku dhintay labo qof oo la sheegay iney ka mid ahaayeen ilaaladiisa.
Guddoomiyaha Rugta Ganacsiga Jubbaland Shaafi Raabi Kaahin ayaa ku geeriyooday Isbitaal ku yaalla magaalada Kismaayo dhaawac ka soo gaaray qarax ismiidaamin ah oo lala beegsaday.
Qaraxan ayaa duhurnimadii maanta lagula beegsaday marxuumka Masaajidka Qadiim ee magaalada Kismaayo Hortiisa, wax yar ka dib markii laga soo baxay salaada Jimcaha, waxaana halkaas isku qarxiyey nin soo xirtay waxyaabaha qarxa.
Guddoomiye Shaafi Raabi ayaa marka hore waxaa qaraxaas kasoo gaaray dhaawac culus oo loola cararay Isbitaalka Kismaayo, halkaasoo wax yar ka hor uu ku geeriyooday, intii lala tacaalayey xaaladiisa Caafimaad.
Madaxweynaha Jubbaland Axmed Maxamed Islaam oo ku sugan magaalada Muqdisho ayaa ka tacsiyadeeyey geerida ku timid Allah u Naxariistee Guddoomiyahii Rugta Ganacsiga iyo Warshadaha Jubbaland Marxuum Shaafi Raabi Kaahin iyo dadkii kale ee ku waxyeeloobay qaraxii maanta ka dhacay Magaalada Kismaayo.
Waxaa Madaxweynahu uu Allah uga baryayaa inuu Naxariistii jano ka waraabiyo sidoo kalana dadka dhaawaca ah uu Caafimaad deg deg ah siiyo.
Madaxweynaha ayaa sheegay in Shaafi Raabi Kaahin uu ahaa muwaadin dalkiisa iyo dadkiisa ugu soo shaqeeyay awood walba oo karaankiisa ah isla markaana la soo qaybsaday duruufo adag isagoo maanta naftiisa ku waayay u khidmaynta shacabka sida uu yiri.
Wuxuu xusay Madaxweynahu in dhagarta wax uu ugu yeeray Argagixisada iyo nacaybka ay u qabaan dadka Muslimka ah ay cadayn dhab ah u tahay sida ay maanta dadka Shacabka iyo Masuuliyiinta kasoo baxay Salaada Jimcaha ugu beegsadeen afaafka hore ee baydka Ilaahay.