Dagaal u dhaxeeya ciidamada dawladaha Armeniya iyo Asarbijan ayaa ka bilawday gobolka ay labada dawladood isku haystaan ee Nagorno-Karabakh la yiraahdo.
Wararku waxay sheegayaan in ciidamada labada dal ay madaafiic isku adeegsadeen waxaana wararku intaa ku darayaan in diyaarado dagaal ka qeyb galeen.
Warbaahinta dalka Armenia ayaa sheegtay in diyaarad nooca dagaal ah oo Asarbijan laga leeyahay lagu soo riday gobolka dagaalku ka socdo.
R/wasaaraha Armenia Nikol Pashinyan ayaa ku eedeeyay dawlada ay dariska yihiin ee Asarbijan inay mas’uul ka tahay dagaalka bilowday hase ahaatee wasaaradda arrimaha dibbadda Asarbijan ayaa eedaas beenisay waxaana ay eeda dusha ka saartay dawlada kale ee Armenia.
Labada dawladood waxay qireen inuu jiro khasaaro soo gaaray dad shacab ah oo labada dhinac xaduuda ka degan.
Dawlada Rushka ayaa ku baaqday in dagaalka la joojiyo wada hadalna labada dhinac iskugu yimaadaan.
Dawladaha dagaalamaya ee Asarbijan iyo Armenia oo ka mid ahaa dawladihii Soofiyeetka ka hor 1991 ayaa isku haysta gobolka hadda ay ku dagaalamayaan ee Nagorno-Karabakh.
Bishii July ee sanadkaan dagaal sidaan oo kale labada dawladood isla gobolkaan ku dhex maray waxaa ku geeriyooday 17 askari oo labada dhinac ah.
