Waxaa uu dib u dhac ku yimid hirgelinta nidaamka doorasho ee lagu heshiiyey sanadkan 2020/2021-ka, kadib markii aan weli la magacaabin guddiga doorashada xilligii loogu talo-galay.
Sida ku qorneyd lifaqa 2-aad ee jadwalka doorashada ee lagu heshiiyey, 10-20-ka October ee bishii dhamaatay ee 2020-ka, waxaa ay aheyd in lasoo magacaabo guddiga doorashada, hayeeshee uu dib u dhac ku yimid.
Sidoo kale maanta ayaa waxaa uu qorshaha ahaa soo xulista, diyaarinta ergooyinka iyo goobaha codbixintana lagu diyaariyo 1-da November oo maanta bilaabatay, balse iyana uu dib u dhac uu ku yimid.
Doorashada Aqalka Sare ayaa dhici doonta 1-da illaa 10-ka December, halka tan xildhibannada golaha shacabka ay dhici doonto 10-ka illaa 27-ka December ee sanadkan.
Doorashada guddoonka labada aqal iyo Madaxweynaha dowladda federaalka Soomaaliya ayaa dhici doonta 1-da Janaayo illaa 8-da Febraayo 2021-ka.
Dib u dhacan oo aan la ogeyn sababtiisa ugu weyn ayaa waxaa uu horseedi karaa dhaqan gelin la’aan ku timaada jawdwalkii lagu heshiiyey ee doorashada 2020/2021-ka.
