Warar dheeraad ah ayaa laga helayaa dagaal u dhexeeyay Ciidamo ka tirsan dowladda Federaalka Soomaaliya iyo Al-shabaab oo ka dhacay deegaan ka tirsan Gobolka Bakool ee Maamulka Koonfur Galbeed.
Dagaalkaas ayaa waxaa uu ka dambeeyay, kadib markii Ciidanka dowladda ay weerar ku qaadeen Saldhig rag ka tirsan Al-shabaab ay ku leeyihii deegaanka Buulo-mareer oo 47 KM u jira degmada Xudur, waxaana la isku adeegsaday hub kala duwan.
Dadka deegaanka ayaa soo weriyay inay maqlayeen dhawaqa rasaasta labada dhinac ay is-dhaafsanayeen, isla markaana uu ka jiro khasaaro isugu jira dhimasho iyo dhaawac oo ka dhashay dagaalka, wallow aysan xaqiijin inta uu la egyahay.
Guddoomiyaha Gobolka Bakool Shiine Macalin Nuur oo la hadlay laanta Afka Soomaaliga ee VOA-da ayaa u sheegay in weerarka Al-shabaab lagu qaaday uu ahaa mid dhabbo-gal ah, kadibna markii dambe uu dhacay dagaal muddo socday.
Waxaa uu sheegay Guddoomiye Shiine Macalin in Shabaab weerar looga dilay 13 dagaalame, halka ay jiraan dhaawacyo, wuxuuna caddeeyay in dhankooda uu ka geeriyooday hal Askari, sidoo kalena saddex ay ka dhaawacmeen.
Ma jirto cid madax banaan oo si rasmi ah u xaqiijin karta ah khasaaraha ka dhashay dagaalkii Maanta ka dhacay deegaanka Buulo-mareer ee hoostega degmada Xudur ee Gobolka Bakool, welina ma jiro wax war ah oo kasoo baxay dhanka Al-shabaab.