Jen. Maxamed Nuur Galaal oo ka mid ahaa Saraakiishii hore ee Ciidamada Qalabka sida ayaa ka mid noqday dadkii ku dhintay weerarkii iyo qaraxii lagu weeraray Hotelka Afrik ee ku yaalla nawaaxiga KM4, halkaasoo galabta ay weerareen Dabley ka tirsan Al-Shabaab.
Xildhibaan Mahad Maxamed Salaad ayaa xaqiijiyay geerida Jen. Galaal oo ka mid ahaa dadkii ku go’doonsanaa Hotelka markii uu weerarka bilowday.
Goobjoogayaal ayaa sheegaya in Meydka Jen. Galaal lagu arkay gudaha Hotelka, waxaana uu ka mid noqday dad hotelka ku jiray oo ay toogteen dableydii hubeysneyd.
illaa iyo hadda ma jirto tiro rasmi ah oo la shaaciyay ee ku geeriyootau weerarka Hotelka Afrik, waxaana socda tirakoobka qasaaraha uu geystay weerarkaas, iyadoo la filayo in Booliska war ka soo saaraan
Al-Shabaab ayaa sheegatay mas’uuliyadda weerarka Hotelka Afrik oo ka mid ah hotelada ugu caansan Muqdisho, weerar ku bilowday qaraxyo oo ay ku xigtay rasaas ay rag hubeysan gudaha ku galeen, waxaana dableyda weerartay ku labisnaayeen dareyska ciidanka.
Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo ayaa tacsi u diray qoysaska iyo ehelada muwaadiniinta Soomaaliyeed ee ku naf waayey weerarkii argagixisanimo ee galabta ka dhacay Muqdisho.
Madaxweynaha ayaa si gaar ah uga tacsiyeeyey geerida, Alle ha u naxariistee, Janaraal Maxamed Nuur Galaal oo ka mid ahaa Saraakiishii Ciidanka Xoogga Dalka, waxa uuna xusay doorkii wanaagsanaa ee uu ka soo qaatay dhismaha iyo tayeynta Ciidamada Qalabka Sida oo uu ka soo qabtay xilal kala duwan.
“Innaa Lillaahi wa innaa Ilayhi raajicuun. Waxaan Alle u weydiinayaa naxariistiisa Janno dhammaan muwaadiniintii Soomaaliyeed ee ku naf waayey weerarkan bahalnimada ah ee argagixisada Alshabaab ay ka fuliyeen Hotelka Afrika, waxaan si gaar ah ummadda Soomaaliyeed uga tacsiyeynayaa geerida Janaraal Maxamed Nuur Galaal oo ka mid ahaa ruug-cadaaga Ciidanka Soomaaliyeed, door wanaagsanna ka soo qaatay tayeynta iyo dhismaha Ciidanka Qalabka Sida.”
Madaxweynaha Jamhuuriyadda ayaa u rajeeyey Muwaadiniinta dhaawacyadu ka soo gaareen weerarkan argagixisanimo in uu Eebbe u boogo dhayo, waxa uuna xusay in shacabka Soomaaliyeed oo isku duuban ay ka guuleysan doonaan cadawgan arxan laawaha ah, maantana la joogo xilligii loo midoobi lahaa in laga xoreeyo guud ahaan dalkeenna.
