Sheekh Nuur Baaruud Gurxan oo kamid ahaa culimada Soomaaliyeed ayaa caawa ku geeriyooday magaalada Muqdisho.
Sheekh Baaruud ayaa ku geeriyooday isbitlaalka Martiini oo xaalad caafimaad loo geeyay, lamana xaqiijin in uu u geeriyooday Covid-19 iyo in kale.
Cudurka Covid-19 ayaa ku soo labakacleeyay Soomaaliya, kaas oo saacadihii la soo dhaafay ay u geeriyooday dad ka badan 10 qof.
Geerida Sheekh Baaruud waxaa ka tasciyeeyay madaxda dowladda federaalka iyo kuwa dowlad goboleedyada.
Sheekh Nuur Baaruud Gurxan wuxuu kamid ahaa culimada ugu caansan Soomaalida.
Dhanka kale Madaxweynaha dowladda Federaalka Soomaaliya Maxamed Cabdullahi Farmaajo ayaa ka tacsiyeeyey geerida Alle ha u naxariistee Sheekh Nuur Baaruud Gurxan oo xalay ku geeriyooday magaalada Muqdisho.
Madaxweynaha oo tacsi tiiraanyo leh u diray qoyska, qaraabada iyo dhammaan ummadda Soomaaliyeed ee uu ka baxay Alle ha u naxariistee Sheekh Nuur Baaruud ayaa tilmaamay doorka wanaagsan ee uu marxuumku ka qaatay arrimaha dacwada Islaamka, barbaarinta iyo baraarujinta shacabka Soomaaliyeed.
“Innaa Lilaahi Wa Innaa Ilayhi Raajicuun. Waxaan u tacsiyeynayaa qoyskii, qaraabadii iyo guud ahaan ummadda Soomaaliyeed ee uu ka geeriyooday Sheekh Nuur Baaruud Gurxan. Marxuumku waxa uu ka mid ahaa tiirarka Culimada Soomaaliyeed ee wakhtigooda iyo noloshoodaba u hibeeyey faafinta diinta, baraarujinta iyo wacyigelinta shacabka Soomaaliyeed.”
Madaxweyne Farmaajo ayaa Marxuumka Alle uga baryey in uu hoygiisa ka yeelo Jannatul Fardowsa, samir iyo iimaanna uu ka siiyo qoyskiisa iyo guud ahaan ummadda Soomaaliyeed ee uu kabaxay.
