In ka badan 83,000 oo qof ayaa ku barokacay Soomaaliya sababo la xiriira biyo la’aan tan iyo bishii Nofeembar ee sannadkii 2020, Xafiiska Qaramada Midoobay ee Isuduwaha ee Arrimaha Bani’aadamnimada (OCHA) ayaa sheegay Jimcihii.
“Waxaa weheliya iskahorimaadka, nabadgelyo darrada ,dhibaatada kale, cimilada qalafsan iyo saadaasha roobab ka hooseeya celcelis ahaan meelaha qaar waxay kordhin doonaan baahiyaha bani’aadamnimada,” ayay OCHA Soomaaliya ku tiri Twitter.
Waxay sheegtay in wada-hawlgalayaasha bani’aadamnimadu ay biyo gaarsiinayaan qiyaastii 300,000 oo qof oo ku dhibaateysan gudaha Soomaaliya maaddaama Sanduuqa Bani’aadamnimada ee Soomaaliya (SHF), oo ah habab deeq-bixiyeyaal badan oo fadhigiisu yahay waddanka, uu u qoondeeynayo ilaa 13 milyan oo doolar wax ka qabashada dhibaatada.
OCHA Somalia waxay intaas ku dartay in Mark Lowcock, xoghayaha-guud ee arrimaha bani’aadamnimada iyo isku-duwaha gargaarka deg-degga ah, “uu taageeray illaa $ 7 milyan oo loogu talagalay waxqabadka degdegga ah iyo illaa $ 20 milyan oo loogu talagalay in lagu hawlgeliyo qaab-dhismeedka Waxqabadka Ka-hortagga.”
Talaadadii, OCHA Soomaaliya waxay sheegtay in xiisadda siyaasadeed ee hadda jirta ay kor u qaadi doonto dhibaatooyinka bina-aadamnimo ee ka jira waddanka ku yaal Geeska Afrika oo ay ku nool yihiin in ka badan 16 milyan oo qof.
Soomaaliya waxaa ka dhacay ismari waaga siyaasadeed kadib markii ay dib udhac kuyimid doorashadii madaxweynaha iyo tan baarlamaanka iyadoo madaxweynaha waqtigiisu dastuuriga ahaa uu dhacay Febraayo 8.
Iska hor imaadkii u dambeeyay ee dhex maray ciidamada dowladda iyo dibadbaxayaasha mucaaradka iyo ilaaladooda amniga ayaa galaaftay nolosha ugu yaraan afar qof, oo ay ku jiraan askar.