Wasaaradda Maaliyada Xukuumadda Federaalka ayaa shaacisay in dhaqaale yari soo wajahday dowladda Federaalka, kadib markii Beesha Caalamka ay joojisay dhaqaalihii ay siin jireen tan iyo bishii agoosto sanadkii 2020.
Wasiirka Maaliyada Cabdiraxmaan Ducaale Beyle oo ka hadlaayay kulan qadka ZOOM-ka ayaa waxaa uu sheegay in Lacagtii lagu kabi jiray Miisaaniyada dowladda laga joojiyay, wixii ka dambeeyay Bishii Ogoosto ee sanadkii 2020, ayna soo wajahday dhaqaale xumi.
Waxaa uu sheegay Wasiir C/raxmaan Beyle in lacago ay horey u siiyeen dowladdaha Qatar iyo Sacuudiga ay haatan dowladda Federaalka ku bixiso Mushaaraadka, isla markaaan lacagahaas dhammaadeen iyagiina.
“Lacagihii kabka ee dunida sannadkii hore ayaa nala ka joojiyey, xoogaa Sucuudiga iyo Qadar na siiyeen ayaan Mushaarka ku bixinaynay iyagiina dhammaadeen, hadda waxaan taagannahay sagxadda, waa in Soomaalidu iskutashato oo dalkan yeelato”ayuu yiri Wasiir Beyle.
Isaga oo sii hadlaayay Wasiirka Maaliyada Xukuumadda xilgaarsiinta ayaa waxaa uu shacabka Soomaaliyeed ka dalbaday inay taageero dhaqaale siiyaan dowladda, maadaama ay soo wajahday dhaqaale xumi tii ugu darneyd.
Dadka falanqeeya Arrimaha siyaasadda dalka ayaa sheegaya in dhaqaale xumida heysata dowladda ay timid, kadib markii khilaaf ka dhex bilowday Beesha Caalamka iyo dowladda Federaalka, kaasi oo salka ku haayay riditaanka Xukuumaddii hore ee Xasan Cali Kheyre.
