Taliyihii Ururka 6aad, Guutada 16aad ee Kumaandooska Danab ee Qaybta Galmudug, Gaashaanle Cabdiladiif Axmed Culusow (Feyfle) ayaa lagu dilay dagaal qaraar, dib uga qarxay Magaalada Guriceel.
Warar is khilaafsan ayaa ka soo baxaya qaabka uu u dhintay Taliyaha. Wararka qaar ayaa sheegaya in Xoogaga Ahlu Sunna ay masaafo fog ka soo toogteen Taliyaha, halka warar kalena ay sheegayan in dhaawac culus uu ka soo gaaray dagaal lagu soo dhabar jebiyay Ciidamada Dowladda, markii dambena uu dhaawacaasi u geeriyooday.
Gaashaanle Feyfle ayay dadku ku barteen dagaaladii bishii July ee Al Shabaab looga xoreeyay deegaanada Bacaadweyne iyo Cammaara, markaas oo door muuqdo uu ku lahaa hawlgalka xoreynta ee Koonfurta Gobolka Mudug. Xilligaas oo darajadiisu ahayd Dhamme ayaa loo dalacsiiyay Gaashaanle.
Dhanka kale xaalad hubinta la’aan ah ayaa caawa laga soo sheegaya inay ka jirto Magaalada Guriceel, ka dib markii Xoogaga Ahlu Sunna gelinkii dambe ee maanta, ay dhowr jiho ka soo weerareen magaaladaasi, dibna ay ugu qaybsadeen qaybo badan oo magaalada ka mid ah.
Wararka ayaa sheegaya in Ciidamada Dowladda iyo kuwa Galmudug ay dib uga baxeen goobihii muhiimka ahaa, ee ay maanta dagaalka uga qabsadeen xoogagaasi.
Ma jirto cid haatan si buuxdo gacanta ugu hayso Magaalada Guriceel, labada dhinac ayaana magaalada ku wada sugan.
Dagaalkan ayaa noqonaya kiisii ugu qaraaraa ee intii muddo ahba ka dhaca Magaalada Guriceel ee Gobolka Galgaduud.
