Guddiga Hirgelinta Doorashooyinka Heer Federaal ayaa lagu wadaa in ay Magaalada Muqdisho kula kulmaan Gudoomiyihii hore ee Golaha Shacabka, Maxamed Sheekh Cismaan Jawaari oo Arbacadii loo diiday shahaadada musharaxnimada ee xubinimadiisa Golaha Shacabka.
Gudoomiye Jawaari ayaa Dowlad Goboleedka Koonfur Galbeed ku eedeeyay in ka masuul tahay tallaabada uu Maamulka Guddiga Doorashada Koonfur Galbeed ugu diiday shahaadada musharaxnimadiisa ee kursiga uu tirsigiisu yahay #HOP103, oo beeshiisa leedahay.
“Ayaamahan waxaan ku sugnaa Magaalada Baydhabo oo waxaan u joognay doorashooyinkii la cayimay ee dadbanaa, kursiga 103 ayaan u tartamaynay, hase yeeshee xoogaa caqabado iyo culeysyo ayaa naga horyimid.” Ayuu Prof. Maxamed Sheekh Cismaan Jawaari ku sheegay shir jaraa’id oo uu Magaalada Baydhabo ku qabtay, ka hor intii aanu dib ugu soo laaban Magaalada Muqdisho.
Gudoomiyaha Guddiga Hirgelinta Doorashooyinka Heer Federaal, Maxamed Xasan Maxamed (Cirro) ayaa sheegay in saacadaha soo socda uu Guddigu kulan ka leeyahay Prof. Maxamed Sheekh Cismaan Jawaari.
“Ka Gudoomiye ahaan Jawaari mar baan khadka ku wada xiriirnay, inkastoo aan weli is arag, laakiin aan rajeynayo in Guddiga ay kulmaan saacadaha soo socda.” Ayuu yiri Gudoomiyaha.
Cirro ayaa sheegaya inay soo gaareen cabashooyin badan, oo dadku kaga cabanayaan inaysan ku qanacsanayn, sida wax loo maamulay.
“Cabashooyin badan oo dad ah way na soo gaareen, iyadoo inta badan dooduna tahay in sida wax loo maamulay aysan ku qanacsanayn.” Ayuu yiri Cirro.
Cirro ayaa intaasi ku daray “Cabashooyinka jira waxa ay noqonayaan in dhowr qaybood loo kala qaado. Cabashooyin waa cabashooyin ay hannaanka doorashadu dad ka cabanayaan, cabashooyin-na waa cabashooyin uun la xiriira wax kala riixasho iyo wax saas ah, oo u baahan baaritaano intaan ka sii badan.”
Iyadoo heer bilow uun ah ay mareyso Doorashada Xildhibaanada Golaha Shacabka ayaa waxaa hareeyay buuq iyo doodo laga keenay habka wax loo maamulayo.
