Ciidanka Booliska Soomaaliyeed, gaar ahaan kuwa ka howlgala saldhigga booliska degmada Xamarweyne, ayaa fiidnimadii caawa xabsiga dhigay Cabdiraxmaan Suleymaan Jaamac, oo ah Guddoomiyaha Xisbiga Shacabka Soomaaliyeed, ka mid ah xisbiyada siyaasadeed ee dalka ka jira.
Sida lagu sheegay war qoraal ah oo uu soo saaray Taliska Qeybta Guud ee Booliska Gobolka Banaadir, Cabdiraxmaan ayaa lagu eedeeyay inuu ku kacay falal liddi ku ah amniga Qaranka.
“Waxaa lagu wargelinayaa muwaadiniinta Soomaaliyeed in ay ka fogaadaan dhiirrigelinta Al-Shabaab ama fal kasta oo wax u dhimi kara amniga Qaranka. Qof walba oo ku kaca arrimo nuucaas ah waxa uu wajihi doonaa sharciga,” ayaa lagu yiri qoraalka kasoo baxay Taliska Booliska.
Booliska ayaa intaa ku daray in Cabdiraxmaan la horgeyn doono maxkamad awood u leh dhageysiga dacwadda loo haysto, iyagoo xusay in hay’adaha amniga ay si dhow ula socdaan wax kasta oo khatar galin kara ammaanka guud ee dalka.
Dhinaca kale, Xisbiga Wadajir oo ka mid ah xisbiyada siyaasadeed ee dalka, ayaa si kulul u cambaareeyay xarigga Cabdiraxmaan Suleymaan Jaamac, iyagoo ku tilmaamay arrintan mid lidi ku ah dimoqraadiyadda iyo xorriyadda muwaadiniinta.
“Xarigga Guddoomiyaha Xisbiga Shacabka waa xad-gudub weyn oo ka dhan ah xuquuqda iyo xorriyaadka aasaasiga ah ee muwaadinka Soomaaliyeed, gaar ahaan xorriyadda hadalka iyo fikirka,” ayaa lagu yiri qoraal kasoo baxay Xisbiga Wadajir.
Waxay intaas ku dareen in dowladdu aysan u adeegsan karin hay’adaha amniga cadaadis siyaasadeed, isla markaana ay muhiim tahay in la dhowro xuquuqda siyaasiyiinta iyo madaxda xisbiyada mucaaradka ah, si loo ilaaliyo kalsoonida dadweynaha ee hannaanka dimoqraadiga ah.
Ilaa hadda ma jiro war faahfaahsan oo dheeraad ah oo laga helay dacwadda rasmiga ah ee loo haysto Cabdiraxmaan Suleymaan, mana jirto wax war ah oo ka soo baxay Xisbiga Shacabka laftiisa oo ku saabsan xarigga Guddoomiyahooda.
