Hoggaamiyaha Dowladda Koonfur Galbeed, Mudane Sheekh Aadan Maxamed Nuur (Sheekh Aadan Madoobe), iyo wafdi uu hoggaaminayo ayaa si diirran loogu soo dhoweeyay magaalada Muqdisho ee caasimadda Soomaaliya, halkaas oo uu uga bilowday safar shaqo oo lagu xoojinayo iskaashiga u dhexeeya Dowladda Federaalka Soomaaliya, Dowladda Koonfur Galbeed iyo saaxiibbada caalamiga ah.
Wafdiga Hoggaamiyaha ayaa waxaa Garoonka Diyaaradaha Aadan Cadde ku soo dhoweeyay wasiirro iyo xildhibaanno ka tirsan Dowladda Federaalka Soomaaliya, masuuliyiin ka socday Dowladda Koonfur Galbeed iyo qaybaha kala duwan ee bulshada ku nool caasimadda.
Safarkan ayaa qayb ka ah dadaallada joogtada ah ee Dowladda Koonfur Galbeed ay ugu jirto xoojinta xiriirka wada-shaqeyneed ee kala dhexeeya Dowladda Federaalka Soomaaliya iyo saaxiibbada caalamiga ah, iyadoo diiradda la saarayo dardargelinta qorshayaasha horumarinta iyo xoojinta dowladnimada.
Inta uu ku sugan yahay magaalada Muqdisho, Hoggaamiye Sheekh Aadan Madoobe ayaa la filayaa inuu kulamo la yeesho madaxda ugu sarreysa dowladda federaalka iyo wakiillo ka socda dowladaha iyo hay’adaha taageera Soomaaliya.
Kulamadaasi ayaa diiradda lagu saari doonaa adkeynta amniga, dardargelinta howlgalka ka dhanka ah kooxaha Khawaarijta, horumarinta adeegyada bulshada, xoojinta wada-shaqeynta hay’adaha dowladda, hirgelinta mashaariicda horumarineed ee Dowladda Koonfur Galbeed, iyo arrimo kale oo muhiim u ah horumarka, nabadgelyada iyo xasilloonida dalka.
Safarka Hoggaamiyaha ayaa la filayaa inuu door muhiim ah ka qaato xoojinta iskaashiga siyaasadeed iyo horumarinta dadaallada lagu taageerayo dib u dhiska iyo horumarka deegaanada Dowladda Koonfur Galbeed.
– Dhammaad –
