Lataliye sare Mudane Duran Axmed ayaa sheegay inuu si farxad leh uga qayb-galay Shirka Guud ee Ururka Midnimada Ciyaaraha Islaamka (ISSA), kaas oo lagu qabtay magaalada Ta’if ee Boqortooyada Sacuudi Carabiya.
Shirka ayaa diiradda lagu saaray arrimo muhiim ah oo la xiriira horumarinta iyo kobcinta ciyaaraha ee 57-ka waddan ee xubnaha ka ah ururka, iyadoo sidoo kale laga wada hadlay qorshayaal lagu xoojinayo iskaashiga dhinaca ciyaaraha.
Mudane Duran Axmed ayaa sheegay in safarka uu ku weheliyo Guddoomiye ku-xigeenka 2-aad ee Guddiga Olombikada Soomaaliyeed (GOS), Cabdixakiim X. Cadaw.
Sidoo kale, Mudane Duran Axmed ayaa kulan la yeeshay Marwo Fardowsa Muuse Cige, oo ah Guddoomiye ku-xigeenka Guddiga Olombikada Qaranka Jabuuti, isla markaana ah Wasiirka Dhallinyarada iyo Dhaqanka ee Jabuuti.
Kulanka ayaa looga hadlay xoojinta iskaashiga iyo horumarinta ciyaaraha ee gobolka, iyadoo dhinacyadu ay muujiyeen muhiimadda ay leedahay in dalalka gobolka ay si wadajir ah uga shaqeeyaan mustaqbalka ciyaaraha.
Duran Axmed ayaa sheegay in kulamadan iyo ka qaybgalka shirarka caalamiga ah ay fursad u yihiin in la xoojiyo xiriirka Soomaaliya, Jabuuti iyo dalalka kale ee xubnaha ka ah ururka.
