Dowladda Koonfur Galbeed oo ka shirtay u diyaar-garowga saameynta El Niño ku soo wajahan geeska afrika.
Hoggaamiyaha Dowladda Koonfur Galbeed Soomaaliya, Sheekh Aadan Maxamed Nuur (Madoobe), ayaa magaalada Baydhabo ku guddoomiyey kulan looga hadlayay diyaar-garowga iyo wax-ka-qabashada saameynta laga filayo roobabka El Niño.
Kulanka oo ka dhacay Madaxtooyada Dowladda Koonfur Galbeed ayaa waxaa ka qaybgalay Guddiga Heer Wasiir ee Diyaar-garowga iyo Ka-jawaabidda Saameynta El Niño iyo Guddoomiyaha Hay’adda Maareynta Musiibooyinka Qaranka (SoDMA).
Mas’uuliyiinta ayaa kulanka diiradda ku saaray khataraha fatahaadaha iyo saameynta kale ee ka dhalan karta roobabka, iyadoo laga wada hadlay qorshayaasha lagu yareynayo khasaaraha ka dhalan kara xaaladaha cimilada.
Waxaa sidoo kale laga hadlay sidii loo xoojin lahaa diyaar-garowga hay’adaha dowladda, loo ilaalin lahaa nolosha iyo hantida bulshada, loona sii diyaarin lahaa gurmad degdeg ah oo loo fidiyo dadka ay xaaladuhu saameeyaan.
Sheekh Aadan Madoobe ayaa adkeeyey muhiimadda ay leedahay in hay’adaha dowladda iyo dhinacyada samafalka ay yeeshaan isku-duwid iyo wada-shaqeyn joogto ah, si looga hortago ama loo yareeyo saameynta musiibooyinka ka dhalan kara roobabka.
Kulanka ayaa sidoo kale lagu eegay baahida loo qabo in la sii diyaariyo agabka iyo adeegyada lagama maarmaanka u ah gurmadka, gaar ahaan deegaannada u nugul fatahaadaha.
Dowladda Koonfur Galbeed ayaa sheegtay inay muhiimad gaar ah siinayso tallaabooyinka ka-hortagga iyo diyaar-garowga musiibooyinka, iyadoo la tixgelinayo saadaasha roobabka iyo khataraha ka dhalan kara.
