Hoggaamiyaha Dowlad Gobolled Koonfur Galbeed, Mudane Sheekh Aadan Maxamed Nuur Madoobe, ayaa magaalada Baydhabo si rasmi ah uga furay Madasha Sanadlaha ah ee Guddoomiyeyaasha Gobollada iyo Degmooyinka Dowlad Goboleedka Koonfur Galbeed.
Madasha ayaa diiradda lagu saaray xoojinta maamulka dowladaha hoose, dardargelinta adeegyada bulshada, xaqiijinta amniga iyo xoojinta wada-shaqeynta hay’adaha dowladda ee heer gobol iyo heer degmo.
Wasiirka Amniga Koonfur Galbeed oo ka hadlay furitaanka madasha ayaa sheegay in Wasaaradda Amniga ay guddoomiyeyaasha la wadaagi doonto qorshayaasha amni ee ay wasaaraddu u dejisay sugidda amniga gobollada iyo degmooyinka Koonfur Galbeed.
Wasiirku wuxuu sheegay in madashu ay sidoo kale fursad u tahay in la isla eego caqabadaha ka jira dhinacyada maamulka, adeegyada bulshada iyo amniga, iyadoo la xoojinayo wada-shaqeynta hay’adaha kala duwan ee dowladda.
Madasha ayaa la filayaa inay sii socoto maalmaha soo socda, iyadoo ay ka qeybgalayaan guddoomiyeyaasha gobollada iyo degmooyinka Koonfur Galbeed iyo mas’uuliyiin kale oo ka tirsan maamulka.
