Diyaaraddii ku burburtay Beledweyne oo la ogaaday inaanu dameer sababsan

Baaritaanada horudhac ee la sameeyay ayaa muujinaya inaanu dameer sababsan burburka diyaaraddii maalintii Talaadada ku burburtay Garoonka Ugaas Khaliif Ugaas Rooble ee Magaalada Beledweyne.

Ka dib burburka diyaaradaasi ayaa waxaa suuqa soo galay in dameer ku sugnaa Garoonka Ugaas Khaliif Ugaas Rooble, xilligii ay diyaaradda ka caga dhiganeysay uu keenay burburka diyaaradaasi, ka dib markii duuliyihii diyaaradda uu mid ka mid ah garabyada ay diyaaradda ku duusho ku dhufsaday dameerkaasi.

Cali Jeyte Cismaan, Gudoomiyaha Gobolka Hiiraan ayaa maanta sheegay in baaritaan badan oo la sameeyay lagu ogaaday in aanu dameer sababsan burburka diyaaradaasi.

Gudoomiyaha ayaa sheegay in tan iyo 14-kii bishan oo diyaaraddu dhacday, ay wadeen baaritaano ballaaran, ayna cadaatay inaanu jirin wax dameer ah oo Garoonka Magaalada Beledweyne soo galay.

Sidoo kale waxa uu sheegay in Garoonka Beledweyne si adag loogu wareejiyay silig, isla-markaana aanay suurtagal ahayn in dameer ama xayawaan kalaba uu gudaha u soo galo garoonkaasi.

Gudoomiye Jeyte ayaa ka dhawaajiyay xilligii diyaaradda ay dhaceysay in Garoonka Beledweyne ay ku sugnaayeen laba Sarkaal oo ka kala tirsan Booliska Somaliya iyo Amisom, kuwaa oo xilligaa muuqaal ka duubaayay diyaaradda, isla-markaana aanu muuqaalka muujinayn wax dameer ah oo gudaha ugu jira garoonkaasi.

Jeyte oo la hadlay BBC ayaa xusay inaanu kala cadayn karin in diyaaradda ay lug u baxday iyo in kale, balse ay fahamsan yihiin in diyaaradda ay baalka bidix ku dhufsatay carro tuur tiilay meel gees ka ah garoonka. Jeyte waxa uu intaa ku daray diyaaradda inaanay dhexda uga degin dhabaha diyaaradaha ku cararaan, ha yeeshee ay ku soo degtay dhinaca bidix ee garoonka.

Diyaaradan oo nooca xamuulka ahayd ayaa Magaalada Beledweyne u waday gargaar, ay Dowladda Jabuuti ugu talagashay in la gaarsiiyo qoysaska ay saamaynta ku yeesheen fatahaadihii ugu dambeeyay ee ka dhacay magaalaadaasi.