Baydhabo-{WMN}-Ciidamada Xoogga dalka Soomaaliyeed ayaa howlgal qorsheysan ka sameeyay Tuulada Bukure ee hoos tagta degmada Maxaas ee Gobolka Hiiraan halkaas oo ay aad ugu xooganaayeen Xubno katirsan Ururka Al-Shabaab.
Howlgalka ayaa ka dambeeyay kadib markii Ciidamada dowladda ay weerar ku qaadeen Tuulada Bukure halkaas oo dhawaan Al-Shabaab fariisin cusub ka sameysteen, waxaana halkaasi ka dhacay dagaal culus oo la isku adeegsaday hubka noocyadiisa kala duwan.
Taliyaha Guutada 5aad ee qeybta 27aad Maxamed Xasan Ibraahim Baakaay ayaa sheegay in howlgalka ay ku burburiyeen Saldhigii weeynaa oo ay Al-Shabaan kulahaayeen Tuulada Bukure, isla markaana ay ka dileen 12 dagaalame.
Waxaa uu sidoo kale sheegay in howlgalka uu yahay mid weli ay ka wadaan tuulooyinka hoostaga degmada Maxaas ee Gobolka Hiiraan ayna siweyn u xaqiijinayaan Amniga Guud ee degaannadii ay kala wareegeen Al-Shabaab.
Todobaadyadii la soo dhaafay ayaa degaano katirsan Gobolka Hiiraan gaar ahaan kuwa hoostaga degmooyinka Matabaan iyo Maxaas waxaa ka socday howlgallo ay wadeen Ciidamada dowladda Soomaaliya oo uu wehlinayo Guddoomiyaha Gobolka Hiiraan, iyada oo howlgallada ay kula wareegeen degaano dhowr ah.
