Baydhabo-{WMN}- Jake Sullivan oo La Taliyaha Amniga Qaranka Mareykanka ayaa dhaliilay waddamada iyo hay’adaha ka gacma laabtay garab istaagga Soomaaliya si wax looga qabto dhibaatooyinka Bani aadamnimo ee la dhibtoonayaan malaayiin ruux.
Waxa uu sheegay in uu aad uga walaacsan yahay saadaasha aan wanaagsaneen ee lagu sheegay in xaaladda macluusha Soomaaliya ay kasii dari karto Bilaha October, November & December 2022 oo ah dhammaadka sanadka haddii aan roob di’in ama gurmad la helin.
Jake waxa uu kufaanay in Dowladdiisa ay bixisay adduun lacageed dhan $706 Milyan (Todobo boqol & lex Milyan oo Doollar) si loogu gacan qabto qoysaska Xoolo dhaqatada & Beeraleyda ah ee barakacayaasha ku biiray.
“Maraykanku waxa uu aad uga walaacsan yahay saadaashan aan wanaagsaneyn iyo baaxadda baahida guud ee Dalka iyo gobolkaba, Macluusha imaan karta waa natiijada arrimo isbiirsaday. Isbeddelka cimilada ayaa weli kasii socda gobolka oo ay ka jirto abaartii ugu xumayd ee Geeska Afrika ka dhacda muddo 70 sano ah” Jake Sullivan, La taliyaha Amniga Qaranka Mareykanka.
Dhibaatooyinka sababta sii kordhisay ayuu Jake Sullivan ku tilmaamay in aanay weli Soomaaliya kasoo kaban xaaladaha ka dhashay saameynta Covid-19 oo dunida aafo ku noqday isla markaana sabab u noqday in wax weliba dhanka kale isu baddelaan.
Dagaalka Ruushka uu ku qaaday Ukraine 24kii Febaraayo 2022 ayuu kusoo daray liiska caqabadaha kordhiyay dhibaatooyinka bani aadamnimo ee sida gaarka ah u saameysay waddamada dhaqaalahoodu hooseeyo.
“Waxaa intaa dheer, duullaankii Ruushka ee Ukraine wuxuu kordhiyey qiimaha cuntada, bacriminta, iyo shidaalka, taas oo uga sii dartay baahida bini’aadanimo iyo ka dhigista gargaarka mid qaaliga ah, isla markaana xaddiday gaaritaankiisa” ayuu yiri Jake Sullivan.
Dowladda Federaalka, Qaramada Midoobay & Hay’ado kala shaqo duwan ayaa saluugay heerka gacan qabashada ah ee Dadka Abaarta saameynta taban ku reebtay ee ku nool Soomaaliya, waxaana intaas u sii dheer colaadda ka jirta Gobollada.
