Faah faahino dheeraad ah ayaa waxaa ay kasoo baxayaan dagaal xalay saqdii dhexe Magaalada Garoowe ku dhexmaray Ciidamada Puntland iyo kuwo taageersan Siyaasiyiinta mucaaradka ee diidanaa furista Dastuurka Puntland.Dagaalka oo sugaar ah uga dhacay Koonfur Galbeed ee Magaalada Garoowe ayaa waxaa ka dhashay khasaaro isugu jira dhimasho iyo dhaawac oo soo kala gaaray badi labada dhinac, sida ay Risaala u sheegeen dad goobjoogayaal ah.Madaxweynaha iyo Ra’iisul wasaaraha Dowladda Federaalka ah ee Soomaaliya, Xasan Sheekh Maxamuud iyo Hamze Cabdi Barre ayaa ku baaqay in la joojiyo colaadda ka taagan magaalada Garowe, iyaga oo dhinaca kale soo jeediyay in kala aragti duwanaanta keentay gacan ka hadalka lagu dhameeyo miiska wadahadalka.Saaxiibada beesha caalamka ee Soomaaliya ayaa sheegay inay ka walaacsan yihiin colaadda magaalada Garoowe iyo ‘saamaynta ay ku leedahay dadka rayidka ah’ sida lagu shegay war-saxaafadeed ay soo saareen goor dambe oo xalay ah.“Saaxiibadu waxay ku baaqayaan in si degdeg ah loo dejiyo xiisadda, laguna soo dabbaalo xasillooni. Waxaan ugu baaqaynaa dhammaan daneeyayaasha siyaasadda inay yeeshaan wadahadal, kaas oo ah tubta kaliya ee lagu xallin karo khilaafaadka” ayaa lagu yiri bayaankan oo intaas raaciyay.Wararkii ugu dambeeyay ee saaka naga soo gaaraya Magaalada Garoowe ayaa waxaa ay sheegayaan in xaaladu ay tahay mid degan, isla markaana Ciidamadii dagaalamay la kala qaaday.
