Madaxweynaha Jamhuuriyadda Federaalka Soomaaliya ahna Taliyaha Guud ee Ciidamada Qalabka Sida, Mudane Xasan Sheekh Maxamuud, ayaa Dugsiga Xananbuure ee Gobolka Galgaduud tababar ugu soo xiray cutubyo ka tirsan Ciidanka Xoogga Dalka Soomaaliyeed.
Munaasabadda xiritaanka tababarka ayaa waxaa ka qeyb galay Madaxweynaha hogaamiyaha dowlad Goboleedka Galmudug, Mudane Axmed Cabdi Kaariye Qoor-Qoor, Wasiirka Gaashaandhigga XFS, Mudane Axmed Macallin Fiqi, Taliyaha Ciidanka Xoogga Dalka Soomaaliyeed, Sarreeye Guuto Ibraahim Maxamed Maxamuud, xildhibaano, saraakiil ciidan iyo marti-sharaf kale.
Ciidamada tababarka qaatay ayaa munaasabadda kusoo bandhigay dhoolatus ciidan iyo gaada ka ciyaar, iyagoo muujiyay xirfadaha iyo aqoonta ay ku soo barteen muddadii uu socday tababarku.
Tababarkan ayaa qeyb ka ah dadaallada lagu xoojinayo tayada, diyaar-garowga iyo awoodda Ciidanka Xoogga Dalka Soomaaliyeed, iyadoo dowladda Federaalka ay waddo qorshayaal lagu tayeynayo ciidamada iyo sare u qaadista awoodda amni ee dalka.
Madaxweyne Xasan Sheekh ayaa marar badan ku adkeeyay muhiimadda ay leedahay in la helo ciidan Soomaaliyeed oo leh tababar iyo tayo wanaagsan, si ay si hufan uga qeyb qaataan sugidda amniga iyo difaaca dalka.
Munaasabadda Dugsiga Xananbuure ayaa kusoo beegmaysa xilli ciidamada dowladda iyo kuwa dowlad-goboleedyada ay wadaan howlgallo iyo dadaallo lagu xoojinayo amniga deegaanada Galmudug iyo guud ahaan dalka.
