Wasiir Ku-xigeenka Wasaaradda Waxbarashada, Hidaha iyo Tacliinta Sare ee Koonfur Galbeed Soomaaliya, Mudane Dr. Ibrahim Ahmed Nour, ayaa kulan muhiim ah la yeeshay Agaasimayaasha Waaxyaha Wasaaradda, kaas oo diiradda lagu saaray dardargelinta qorshaha shaqo ee 100-ka maalmood ee Wasaaradda.
Kulanka ayaa si gaar ah looga wada hadlay sidii loo dardargelin lahaa 100-Day Work Plan-ka Wasaaradda, xoojinta isla-xisaabtanka, kor u qaadista wada-shaqeynta waaxyaha iyo hubinta in qorshayaasha loo dejiyey Wasaaradda ay ku dhammaadaan waqtigooda, isla markaana ay keenaan natiijooyin la taaban karo.
Wasiir Ku-xigeenka ayaa Agaasimayaasha ku boorriyay inay si buuxda u gutaan waajibaadka iyo masuuliyadaha loo igmaday, iyagoo mudnaan siinaya ilaalinta waqtiga, tayada shaqada iyo wada-shaqeyn dhow oo dhex marta dhammaan waaxyaha Wasaaradda.
Dr. Ibrahim Ahmed Nour ayaa sidoo kale xusay muhiimadda ay leedahay in qorshaha 100-ka maalmood loo fuliyo si nidaamsan oo masuuliyad leh, si loo gaaro waxqabad muuqda oo si toos ah uga qeyb qaata horumarinta adeegyada waxbarashada ee Koonfur Galbeed Soomaaliya.
Kulankan ayaa qeyb ka ah dadaallada Wasaaradda ee lagu xoojinayo hufnaanta shaqada, isla-xisaabtanka iyo hirgelinta qorshayaasha waxbarasho, iyadoo la hiigsanayo in muddada 100-ka maalmood lagu gaaro natiijooyin muuqda, wax-ku-ool ah oo horseeda horumar la taaban karo oo ku yimaada adeegyada waxbarashada.
