Wasiir Ku-xigeenka cusub ee Wasaaradda Ganacsiga iyo Warshadaha, Mudane Osmaan Daalo, ayaa maanta si rasmi ah ula wareegay xilka loo magacaabay, kaddib munaasabad xil-wareejin ah oo ka dhacday xarunta Wasaaradda.
Wasiir Osmaan Daalo ayaa xilkan dhowaan loogu magacaabay go’aan uu gaaray Ra’iisul Wasaaraha Xukuumadda Federaalka Soomaaliya, Mudane Xamsa Cabdi Barre, waxaana xilka si rasmi ah ugu wareejiyay Wasiir Ku-xigeenkii hore ee Wasaaradda.
Munaasabadda xil-wareejinta waxaa ka qeyb galay Wasiirka Wasaaradda Ganacsiga iyo Warshadaha, Wasiiru-Dowlaha, agaasime waaxeedyada iyo qaar ka mid ah shaqaalaha Wasaaradda.
Wasiir Osmaan Daalo ayaa uga mahadceliyay Wasiirka Wasaaradda, Wasiiru-Dowlaha iyo Wasiir Ku-xigeenkii hore sida ay xilka ugu wareejiyeen, isagoo sidoo kale bogaadiyay shaqaalaha iyo agaasime waaxeedyada Wasaaradda oo si wanaagsan u soo dhaweeyay.
“Waxaan u mahadcelinayaa Wasiirka Wasaaradda Ganacsiga, Wasiiru-Dowlaha iyo Wasiir Ku-xigeenkii hore oo isagana xilka igu wareejiyay. Sidoo kale, waxaan bogaadinayaa dhammaan shaqaalaha iyo Agaasime Waaxeedyada Wasaaradda Ganacsiga sida sharafta leh ee ay ii soo dhaweeyeen iyo sida wanaagsan ee ay u soo qabanqaabiyeen xafladda xil-wareejinta,” ayuu yiri Wasiir Osmaan Daalo.
Wasiirka ayaa sidoo kale sheegay inuu diyaar u yahay in uu si hufan uga shaqeeyo waajibaadka loo igmaday, isagoo ballanqaaday inuu si dhow ula shaqeyn doono madaxda iyo shaqaalaha Wasaaradda, si loo horumariyo howlaha la xiriira ganacsiga iyo warshadaha dalka.
Ugu dambeyn, Wasiir Osmaan Daalo ayaa sheegay inuu rajeynayo wada-shaqeyn wanaagsan, guul iyo horumar, isagoo ku boorriyay dhammaan masuuliyiinta iyo shaqaalaha Wasaaradda inay si wadajir ah uga shaqeeyaan horumarinta adeegyada iyo howlaha Wasaaradda Ganacsiga iyo Warshadaha.
Halkan hoose kadaawo kalimada Wasiir Daalo
https://x.com/Warsannews/status/2090303346540163230
