Ugaas Xasan: Reer Hiiraanow nabadgelyada halaga shaqeeyo, shaqo badanaa idinku soo furan

Ugaas Xasan Ugaas Khaliif Ugaas Rooble, ayaa si adag dadka reer Hiiraan ugula dardaarmay inay ka shaqeeyan nabadgelyada, haddii ay dhisanayan Maamul Goboleed uu leeyahay Gobolka Hiiraan.
Ugaas Xasan Ugaas Khaliif, ayaa tilmaamay in laga yaabo dad badani inaysan waxba ogayn, isagoo carab dhabay in shaqo badani ku soo fool leedahay dadka reer Hiiraan.
“Reer Hiiraanow waxaan idin kula dardaarmayaa hal qodob, nabadgelyada halaga shaqeeyo, shaqo badanaa idinku soo furan. Dad badanaa laga yaabaa inaysan waxba ogayn.” Ayuu yiri Ugaas Xasan Ugaas Khaliif.
Waxaa uu bulshada uu ku wargeliyay inay ogsoonaadan in dagaalo iyo dilal qorsheysanba lagu soo abaabulayo, loogana gudbi karo iyadoo amniga laga shaqeeyo.
“Dagaalaa la’idinku abaabulaa, dil baa la’idinku abaabulaa ogaada, waxaa loo baahan yahay inaad nabadda ka shaqaysaan.” Ayuu yiri Ugaas Xasan.
Ugaas Xasan, ayaa ku waramaya in kol kore uu ka digay in dadka deegaanku yihiin xabad sugayaal, habeen walbana qof lagu dilo Magaalada Baledweyne, hadana ay amni ahaan ka wanaagsan yihiin Magaalada Muqdisho.
“Dadkaanu inuu xabad sugge yahay horaan u sheegay, hadana waad ogtihiin Magaaladaan, habeen walbo qofaa lagu dilaa, laakiin nabadgelyo markii laga hadlayo Xamar waan dhannaa. Reer Hiiraanow isu tashada, maamul waan dhisanaynaa.” Ayuu yiri Ugaas Xasan.
Ugaaska, ayaa hadalkan Talaadadii ka sheegay Magaalada Baledweyne, xilli looga dhawaaqay Dhismaha Maamul Goboleedka uu yeelanayo Gobolka Hiiraan.